U President ka USA u Donald Trump da yaroh u ya u Prime Minister Narendra Modi deiwa ong wa yooluti bha u wow lai cha India. Hawa yaklam wa kiwa pathai khubor ha Joint Base Andrews ha Washington ynnin i miet, u Trump da ong u wa sñiawsuk bha u ya u Modi. Wei hajrong ka ya soi soskular wa yatoh waka khayi pateiñ hapyrdi ki ar ri, da ong u wa ym tip u wa lada daw soi ha i por wa em u ha India namo hadien won ka US President Election ha u Khonchonglad (Nov). U Trump daw poi u cha India haka 24 wa 25 tarik uni u bnai.
Ya u US President Donald Trump daw pdiang sñiawbha da u Prime Minister Narendra Modi ha Sardar Patel International Airport, Ahmedabad haka 24 tarik. U Trump daw pdiang burom leh ya oo daka Guard of Honor manda poi u ha Airport, wei hadien ini daw lai nyngkong u deilang wa u Narendra Modi cha Sabarmati Gandhi Ashram.
Hadien ini daw lai u cha Motera Stadium, Ahmedabad kawa dang wai thymme wei man ko leh ka Cricket Stadium wa heh dooh hapoh pyrthai kawa ye u em hadooh 110,000 ngut ki bru paitke hapoh yong ka heiwa daw pynman yaka yalang wa da e pyrtuid Namaste Trump.
Katkam wa ong u Ahmedabad Municipal Commissioner u Vijay Nehra da antaad wa kamwa 1.20 lak ngut ki bru daw wan ki cha kani ka Namaste Trump wei kamwa 2 lak ngut ki bru wow wan sakhi yei lai u Trump na Airport cha Motera Stadium.
U Narendra Modi ha u Twitter da ong u wa da leh katwa ye yow man kani ka wan u Trump kawa sahkynmoo ya oo yow pynskem leh yei yatoh lok kini ki ar ri.
Ka Melania Trump leh ha Twitter da ong ko wa sñiawkmen bha ko wan wan cha India.
U Prime Minister Narendra Modi ha u Naikhynde u 2019 da dep wan u na Texas, USA wei da pdiang burom ya oo da ka yalang wa e pyrtuid Howdy Modi.
Discussion about this post