Jowai: Ka Hills Farmer’s Union (HFU) seiñbei kawa man ka seiñ ki warep hapoh ka jylla wa pait yei hok ki warep nadooh i chah ktah ha ki bor rymaw wa kiwi kiwi da pynman ko ya ka yalang ynnin ha Iawpynsiñ Wahiajer, West Jaiñtia Hills District, heiwa u General Secretary ka seiñ u Allfondbirth Kharsyntiew da ong u wa da leh yeini hadien wa yoo yei chitom ki warep, nadooh i wym ka yaaw wa biang ,ki thaw booh mar ki wym pyud wa i chah ah kilo.
U Allfondbirth da ong u wa katwon man i iwa sarom neibhah manda poi ha yaaw da booh dor da kiwa thied, wei i chah ksih dor iwa pyndooh mynsien ya ki warep wei ya ki mar haap pynlait khnang wow lait ki u sepai.
Da ong u leh wa iwi na ki kaam wa jop ka seiñ toh i pyrchah yei chah ah kilo ha Iewduh neidaw wa yoh hukum ki na u syiem ka Hima Mylliem yeiwa da leh syndet wow khate chi kilo na ka 10 kilo.
Neiliang u President ka seiñ u Commander Shangpliang da pynche u wa emkaam wow em ki aiñ wow kdung ya ki warep kam ka aiñ Minimum Support Prize (MSP) neibynta waroh ki mar wa pynmih da ki warep haka jylla, khnang wow yoh lap, wei wow dawa na ka sorkar wow pynbiang ya kiwa boon kiwa emkaam ki warep khnang wa u yaryngkat ki wa kiwi tawon ka jylla ka ri.
Kamtæ da kyntu ya ki warep wow seiñ ya ki unit haki thaaiñ yong ki khnang wow ye u wanrah yei kylla kamwa da thrang wa angnood ki.
Ki warep wa wan ha kani ka yalang da pynsñiaw ki yei eh i khoo yong ki wei ya kani ka yalang da pynlai da u Mosses Suting uwa man kam u Convenor ka yalang.
Discussion about this post