Ka All Jaintia Muster Roll Worker & Labour Union deilang waka All Jaintia Midday Meal Worker Union ha ka sngi Muchai 30 tarik da khut pynman ko ya ka yalang pynsñiawthooh paidbah chaphang ki Scheme sorkar wa yatoh wa ki bru wa kreh mylla kiwa im u kamai jakpoh ha ki kaam wapher wei ya kani ka yalang da pynman ha yung skur ka Ladthadlaboh.
Neiliang kiwa yahkhmat yong kani ka seiñ da khana ki wa ka thong wa hakhmat yong kani ka yalang toh wow lai pynsñiawthooh ya ki paidbah wa chong chnong ka District chaphang kammon u man kiwa chong chnong kiwa tip yei hok yong ki kamjooh ya ki laad yarap waphær yong ka sorkar bei wei kiwa lait leh nei chah phon chah chakæ næ imsngi u kamai spah da ka luti wym hok.
Hajrong ka phang wa kyrpang yong kani kani ka yalang wa da ong “Lehbha katni, u Kune i, Ya Ka Mynstep: Ioh ka Mynried u Chngaaiñ, Pateiñ u Kyllep u Sdep”. Kiwa yahkhmat yong kani ka seiñ kiwa da e yei klam i kappæ toh u Kitboklang Shadap, Vice- President AJMW&LU-CEC, u Dapherborn N. Suchiang, General Secretary, AJMW&LU-CEC, u Khroo Lamsalanki Pariat, Adviser AJMW&LU & AJMDMWU wa ka Mary Shangpung, Treasurer Thadlaskein C&RD Block.
Chooh chooh ha kani ka yalang da wan embyntalang leh da ka Bethcy Merry Toi, Labour Inspector West Jaiñtia Hills kawa da batai chaphang ka Eshram wa kiwi kiwi ki laad yarap kiwa ka sorkar bei da mang kyrpang ko neibynta ki bru kreh mylla kamjooh leh neiliang u Biangpor Shylla won da e u i khana pynsñiaw chaphang ka CSC kam kawi na ki laad ki luti wa da booh kyrpang ka sorkar bei ha kylleiñ ki chnong neibynta wow pynsuk pynjan yei rukom krehkaam hapyrdi ka sorkar wa ki paidbah wa chong chnong iwa man katkam i yah ka juk ka por lyngba ki kor Computer.
U Khroo Lamsalanki Pariat hawa e kyntien ha kani ka janmiet dap u dei khia pyrkhat yei wym chimkhia ki manpa næ ki khynroo wa kreh Mistri u Register hapoh yong ka Eshram heiwa da kyrsu kyntu joor u ya ki bru kreh mylla khamtam ki Mistri wow chim ki ya kani ka laad ka kabu ksiar kawa ka sorkar da mang kyrpang ko neibynta i myntoi yong phi katwa dang chah i por ya samboi pathan hadien habood man da khang ka dwar u silet tamdien phi.
Khaddooh da pynkut ya kani ka yalang da i puræ soskular (Pledge) da waroh kiwa ya chimbynta hei yakhmat ka Banaras Dhar, General Secretary, AJMW&LU, Khliehriat Block.
