Ka Khynroo Khyllood Committee Seiñraij Jowai deilang ka Lei Synshar Cultural Society ha uni u snem kam chibynta ka dak i kynmoo warom ya ka lyngkhooh snem yap wa 161 u Kiang Nanngbah, ynne ka sngi da chim ki wow pynman ka yalang wa kyrpang neibynta ki khon khynroo khyllood ka Ri-loom Jaiñtia kawa tip deiwi i ktien kam ka 1st Youth Conference.
Ya kani ka yalang da pynman ha Yungwalieh ka Dulong heiwa da wan wow thang charak da u Pearlet Toi, CEO Meghalaya Khadi Village Industry Board kam u kongsan hei emlang u Pa Dolloi ka Elaka Jowai. u waheh Puramon Kynjin, u President ka Seiñraij Jowai, u O.H.Toi, ka Mena Laloo, President Lei Synchar Cultural Society wa kiwi kiwi ki waheh wasian, manbei manpa na kiwi ki chnong ki Raij.
Haka yalang yahkhmat yong kani ka sngi hei pynlai u Kamnipaia Challam, General Secretary, Lei Synchar Cultural Society da yoh i ngoohblai ngoohsyiem na u khynroo Ebormi Sungoh, dkhot ka KKC Seiñraij, katwa i klam i kappæ wei kyntien e mynsien ya ki khon khynroo khyllood da pachat da ka Meena Laloo, u O.H. Toi wa kamjooh na u Pearlet Toi.
U Pearlet Toi hei klam yong oo katkam ka thong yong kani ka sngi, da kdar u wow khana chaphang i parom wa tbian iwa jia ha u snem 1835 iwa u Kiang Nangbah ha itæ i por da man u kam u khynnah ter ter hadooh u snem 1862.
Iwa kyrpang heini i klam u Pearlet Toi toh iwa e mynsien u ya ki khon khynroo khyllood wow man kiwa chlur u klam wei u leh ya iwon iwon i kaam ha ka yurim yong i hok wei miat i bha yonglang khlem da em i tieñ wei itæ toh kawi ka luti kawa kam ki pateiñ boodlate i ya ki deinkjat u Kiang Nangbah.
Ka bynta wa ar yong kani ka Youth Conference ha kani ka sngi toh i wan chimbynta u Wansalan E Dhar wow khana pynsñiaw hapyrdi ki khon khynroo khyllood hajrong ka phang wa ong “U Kiang Nangbah Kam u Khon Dapchynrang” katwa u khynroo Chanhun Laloo, dkhot ka KKC Seiñraij Jowai da klam u hajrong ka phang wa ong, “Ki kaam wa chemphang wa tule yei suk ka pateiñ”.
Discussion about this post