Ka Khynroo Khyllood Committee, Seiñraij Jowai ynne ka sngi da pynman ko yei e snaam sñiawbha haka Blood Bank Centre yong ka Jowai Civil Hospital wa em ha Panaliar, Jowai.
Ka thong i pynman ya kani ka e snaam toh chibynta ka dak i kynmoo warom ya ka lyngkhooh snem yap wa 161 u Kiang Nangbah ka wow man ha ka 30 tarik Kmaichonglad.
Ha ka yalang yahkhmat yong kani ka snagi hei pynlai u khynroo Sienmi Lato, Chairman KKC Seinraij da yoh i ngoohblai ngoohsyiem na u Wansa O Dhar hadien neitæ pynbood i klam i kappæ na u Arwotki Sumer, General Secretary, Seiñraij Jowai, neitæ ka Dr. P. Shylla, Medical & Health Officer In-charge Blood Bank Jowai katwa hei pynkut wan u Kamnipaia Challam uwa da pachat u ki kyntien sñiawngooh.
Ka Dr. P. Shylla hawa e yei klam da yaroh ko ya ki Khon Khynroo ka Seinraij kiwa da pteiñ u leh yeini i kaam chibynta ka dak i burom ya ka lyngkhooh snem yap u Kiang Nangbah chibynta wan wow pynim yei mynsien wa kordor yong ki para bru wa ban i kjut i chitom kiwa dawa u yoh yei snaam ha ki thaw sumaar waphær yong ka East waka West Jaiñtia Hills.
Chooh chooh e mynsien ko ya kiwi wow ya chimbynta ha kam kini ki kaam neibhah i e yei snaam yarap ko leh wow pynman ya ki bru kiwa chait wa khiah wei e ko leh i sñiawngooh wa khroo ya ki Voluntary Blood Donor kiwa wan na ki por cha ki por wow e yei snaam kat hadooh wow man kani ka Blood Bank kawa ye u e i chakri ya ki paidbah ha waroh ar tylli ki District yong ka East wa ka West Jaiñtia Hills.
Kiwa da yoh laad wow e snaam ha kani ka sngi da em ki 13 ngut.
Discussion about this post