Uwi u manpa uwa em i thrang i angnood wow wanrah yei rukom ah doh wa khooid wa pliah wei wow dai leh ha ka dukan kawa khooid wa biang i sumaar yei doh khnang yow lait ko u ktah yei chait i khiah ki paidbah wa baam, ha kani ka kynti ini i angnood yong oo da mankaam i hadien wa da ye u wow wai ya ka yung ah doh yong oo kawa da chna u ha Ialong hajan ka Toll Plaza, wei da ye u leh wow wai ya ka dukan wow dai doh hadien wa dep ah kawa em ha Soomer hajan laad Jowai Bypass kawa pyrtuid Humediam One-Stop, Meat Shop, Fresh, Hygienic, Fine Cut.
Ya uni u manpa da tip pyrtuid kam u Heipormi Laloo uwa na ka chnong Mowkaiaw, West Jaiñtia Hills District.
Ya kani ka yung ah doh wei dukan dai doh yong oo da wai ha ka 18 tarik uni u bnai da u Dr. Mihsalan Lamare, District A.H. & Veterinary Officer, East Jaiñtia Hills District chirup i emlang u Rev. D.S. Laloo, u Rev. R. Laloo najrong kiwi won ki bru waheh wa kiwa ha-yung ha-sem yong oo.
Hei yaklam wa u Heipormi Laloo khana u wa ya kani ka kaam da ye u pynman kaam dei yarap kyrchaan poisa ka “Prime Meghalaya” kawa da kyrchaan ya oo Rs. 10 lak yow sdang ya kani ka kaam. Tangwa neidaw wa wai haroh u wa ka dukan kamtæ yei lut hap pyndap u na oo haroh.
Hei lai luti ya kani ka kaam khana u wa da paan buit haroh u na ki Doctor Veterinary kamjooh ki Scientist napoh ka ICAR kiwa da pynchlur wei e sikai ya oo kammon u kreh wei pynpliah ya kani ka kaam.
Kamwa man kattæ ha kani ka thaw da ah u du yei doh sniang wa doh syiar, wei katwa ye u pyrchang u wow chim da kiwa ri wa psan ha kani hi ka thaaiñ, neitæ i rukom ah leh toh deiwa khooid wa pliah najrong wa pynemkaam haroh u ki kor ki bor katkam ka juk stat katni.
Katwa ha dukan won dai haroh u ki dakha kiwa chim u na baar deiwa yaleh u pynkhooid pynpliah chwa ya ki.
Ya ki le jait ki doh wa dai u ha kani ka dukan leh da sumaar wei booh bha u hapoh ka Freezer khnang yow neh slem i miat ki doh.
U Dr. Mihsalan Lamare kam u kongsan wa wan wai ya kani ka yung ah doh kamjooh ya ka dukan, da e yaroh u hajrong i chim u Heipormi Laloo ya kani ka kaam kawa rap phær wei yooluti haroh u kamwa da lai thooh yumut u na ki bru chemphang chwa u lai chakhmat ya kani ka kaam, u bood ryntih haroh u katkam ki kyndon wa da booh.
Ong haroh u kani ka yung ah doh wa ka dukan dai doh wa kam kani toh kawa nyngkong dooh ha Ri-loom Jaiñtia ka wow pyntikna yei khooid i pliah wa i chngaiñ ki paidbah wa baam.
Ngait skem haroh u wa ini i kaam uni u manpa u nang ku ko chaphrang khnang yow ye e khih u ya kiwi.
Discussion about this post