Ynne ka sngi ki pulit da yoh ki wow kem ya uwi u bru wa suba joor wa tynyap u ya ka Ebamon Siangshai (16 snem) kawa na Pamrakmai, East Jaiñtia Hills wei ya i takit wow chemdien ya uni u bru toh da leh da ka Crime Branch Police Station chirup wa ka Crime Scene Unit wa ki pulit ka East Jaiñtia Hills.
Katkam ka yutip wa da yoh da ong wa da kem noh ya u Heibormi Dkhar uwa 21 snem i rta na Pamrakmai ya uwa da suba joor wa emkti u wow tynyap ya ka.
Chooh chooh da ong wa u Heibormi da ksih u ya ka Ebamon ha i step ka 12 tarik heipor wa dang thmu ko wow lai Class ha Wapung Higher Secondary School Wapung wei da murieh u ya i metyap yong ka wei hei miet da pynemkaam u da kawi ka kari wow thooh ya ini i metyap wow lai noh ha iwi i khloo ha Arkilo, Dkhiah East.
U Heibormi toh uwa ya toh paralok wa ka Ebamon wei sah ki ha ka jooh ka chnong wei da suba joor wa i daw wa tynyap u ka toh neidaw wa bichni u ya ka.
Heiyatoh wa ini neiliang ki pulit dang pteiñ ki yei takit wow chemdien chooh lada em kiwi kiwa emkti wa u Heibormi ha ini i kaam.
