Shillong: U montri kaam pohyung ka jylla uwa pait leh heijooh i por yaka chnat khloo, u Lahkmen Rymbui da ong u wa ki bru kiwa pynyap dusmon ya ki mrad u toh ki ha ka kyndon yong ka Wildlife Protection Act 1972, wei katkam ka Section (51) daw chah pynchitom deiwa kset patok hadooh 7 snem deilang waka kuna T.25,000.
Heiyatoh wa i yap yong kawi ka dngiem ha ka chnong Mawpyrtuh kawa haap ha Pynursla Civil Sub Division, u montri da ong u wa ynnin ka sngi da kem noh ya uwi wei ynne ka sngi da kem biang sa 9 ngut ki suba emkti wow pynyap dusmon ya katai ka dngiem.
Da pyntip u wa ya kini ki bru da kem da ka Wildlife Wing yong ka chnat khloo wei katni em ki ha ka takit, deiwa ong leh wa lada chem wa kini ki bru emkti ki wow pynyap yaka dngiem daw ngat ki ha ki kyndon aiñ ka Wildlife Protection Act 1972.
Da ong u wa lada kiwa chong chnong chem ki wa em ki mrad kiwa wa pynjæd ki yaki thaw rep næ ya ki chnong, toh u pyntip ki cha ka sorkar, wei ka sorkar daw yarap ko lada emkaam wow kem næ wow chim da kiwi ki luti ym toh wow pynyap. Da ong leh wa ya ki bru kiwa pyntip kiwa wan e kti ya ki mrad khloo wa da yoh kem, ka sorkar leh burom ko yaki man u snem ha ka sngi lehkmen wow pynneh pynsah ya ki mrad.
Ha i jooh i por u Rymbui da kyntu u ya kiwa chong chnong wa ym toh u kem næ siat beiñ ya ki mrad khloo næ ki sim ki doh khamtam ha kini ki por wa lyngam ki sarok wa ki chnong neibhah wa em ka khang chnong. Da yaroh u leh ya ki dorbar chnong kiwa da pynmih ya ka rai wow khang yei pynyap beiñ ya ki mrad.
Discussion about this post