Hadien wa joor i dawa wow pynchitom ya ki chipai BSF kiwa da siat ya u Roning Nongkynrih ha ka miet yong ka 5 tarik uni u bnai. Neiliang ki bor chipai yong ka Border Security Force (BSF) da kem noh ki ya le ngut ki chipai ka BSF.
Ya kini ki le ngut ki chipai da kem ynnin i miet ka 8 tarik wei ka takit kattæ dang lai ko chakhmat.
Neiliang ki chipai BSF da pynmih ki ya ka hukum wow pynman da ka Court of Inquiry hajrong ini i jia.
Kini ki le ngut kiwa em ha katai ka miet heiwa da jia i chah siat u Roning toh kiwa tip pyrtuid kam u Moni Singh uwa man u Head Constable, u Constable Sengel Singh wa u Constable Kdam Kishore.
Heijooh i por da pyntip leh wa ki bor yong ki chipai BSF da beh kreh ki chipor ya u Moni Singh uwa da siat hadooh 3 kuli na ka suloi SMG Beretta wei da phah ya oo cha BSF Headquarter ryngkat ka hukum wym toh u mih u khlem da yoh bor.
Ha katai miet wa jia, ki chipai BSF da siat yap ki ya u Roning ha Mawshun, kawa haap hapoh Pynursla Sub Division hajrong i suba wa oo toh uwa khayi masi pyrchah ya ka aiñ.
