Ynnin ka 27 tarik kawa man leh ka sngi kut yong ka yalap ya ka Election chiteiñ samoi, da em i jia kynaad hapyrdi kiwa kyrchaan ka Congress wa ka NPP ha ka chnong Garodubi kawa haap hapoh ka Rajabala Constituency, WGH heiwa da pynbaad wa kiwa kyrchaan ka Congress da lai thombor ki ya i yung yong uwi uwa yahkhmat ka NPP, wei ha ini jia, ki bru na waroh ar liang da mynsoo ki wei da pynbaad markylliang ki.
U Chief Electoral Officer (CEO), u Federick R Kharkongor da pyntip u wa da yoh yutip na u District Election Officer hajrong itai i jia, heiwa da pyntip u wa i ya kynaad wa da mih hapyrdi kiwa kyrchaan ka Congress wa ka NPP hadien wa da wai ka yalap Election kawa da kut heipor 4 waje i janmiet.
Da pyntip u wa ini i kynaad wa da mih hapyrdi ki 21 ngut ki bru wei kiwa boon na kini da mynsoo ki malu mala, wei kini ki 21 ngut toh na ka seiñ NPP wa na ka Congress, da pyntip u wa ha itai i por da em chi kynhun ki bru kiwa lai lyngba ka yaw kawa em ha Garodubi wa kiwi ki chnong wa marjan, wei hajrong itai i kynaad da yoh leh yei ujor na u Election Agent ka NPP, wei hajrong itai i ujor da e leh da ka FIR.
Katkam wa pyntip u CEO, ki pulit da kem ki ya 4 ngut ki bru hajrong itai i jia wei da pynkrehkaam wut wut da ka Section 144 CrPC ha ka thaaiñ waroh kawi, heiwa da pynjoor leh yei phah sonteri ki pulit yow lait nei poor i kynaad.
U CEO da pyntip u leh wa katni da ye wow kdoh u khoom ya iwon iwon i jia, heiwa da phah leh ya ki bor District wow man kiwa paitbniah bha.
Hawa kylli ya ki pulit wa da phah da ka chnat Election yow pynkhreh neibynta ka sngi wow thap Vote ha ka 30 tarik, u Kharkongor da pyntip u wa da phah 4 pyrton ki pulit CAPF kiwa pynpoi da ka sorkar pyrdi ya kiwa daw phah cha ki thaw wa ye u em i jia. Katkam wa pyntip u CEO, da em kamwa 29 tylli ki Polling Station kiwa ye wow mih ka huri hura ha Rajabala Constituency, kamwa 7 tylli ha Mawryngkneng wa 10 tylli ha Mawphlang.
U CEO da pyntip u leh wa wa najrong ki pulit CAPF, ka chnat da yoh ko leh ya ki pulit ka jylla wa ki Home Guards wei da pynemkaam leh da kiwi ki laad wow pyntikna wa ka Election u lai bait ko.