Ka Seng Khasi Kmie, Shillong, da pyntip ko wa neidaw wa pteiñ i ban ka khlam COVID-19, kamtæ i ya mih paidbah wow pyndep ya i kaam ‘Kiew Eh Rngiw’ kawa chisien chi snem, daw hap wow pynrkhiñ wei bood ryntih bha ya ki kyndon kat kamwa da dep dep thoh dak da ki bor synchaar.
Ha ka kyrwoh wa da pynlait ynne ka sngi, u D.K. Dkhar, President Seng Khasi Kmie deiwa emlang u Haines Marbaniang, General Secretary wa u I. Sun, Chairman Lum Sohpetbneng Committee da pynsñiaw ki wa ha ka 30 tarik uni u bnai kawa man wow pyndep ya ka lehniam kawa chi haat chi tayaw, i ya embynta ha kani ka sngi itæ i ngooh i dem ha Lawnongthroh wei kamjooh ha ka Mei Mawbuh, toh du ya ka Committee ka yong U Tymmen U San, ki dkhot yong ka Lum Sophtebneng Committee wa ki dkhot ka Jylli Pyrkhat Kam Seng Khasi Kmie.
Neiliang u D.K. Dkhar, President Seng Khasi Kmie, da ong u wa ini i pynmih ya kini ki kyndon toh wow yada nei chah ktah biang ha ka khlam ka ngop COVID-19 kawa dang ku smat ha kini ki sngi.
Kamtæ hawa yatoh wa ini uwa yahkhmat dooh yong ka seiñ, u D.K. Dkhar da paan-maap u na waroh ki parakur parakha para kher paramer, wa ini i pynmih ya ini i pynbna da man ko hadien wa da ya chong pyrkhat sani wei puson bha neibynta i bha i miat uwa lum wa lang.
U D.K. Dkhar da yieñ u wow pynkynmoo wa kam ka jaitbru wa Tip Bru wa Tip Blai wa ksoh ya ka niam tynre ka bri u Ynñiawtrep Ynñiawasa, wa ri da akor wei burom- wow man kiwa sñiawthooh wa kiwa chemphang wei wow bood ryngkhi ya kini kiwa da pynbna lane kiwa da khang, kawa daw man kam chibynta ka nongmuna ya ki khon ki ksu wa ka pateiñ kawa daw wan.
Chooh chooh da khang leh ya kiwon kiwon ki bru wow wai namo booh ya ki dukan dai cha dai ja lane wow dai ya iwon iwon hapoh u pood u ang u Lum Sohptebneng iwa hapoh i pait næ yoo ka Seng Khasi.
