Mawryngkneng: Ka Dorbar Chnong Mawryngkneng, Khyrim Syiemship haka 2 tarik uni u bnai da chim ki yaka rai wym chah de wow pynemkaam Plastic hapoh ka chnong Mawryngkneng waroh kawi kawa kynthup hapoh ka Iew Pomtiah Mawryngkneng nadooh katai ka sngi.
Neiliang ka Dorbar Chnong Mawryngkneng da pynsñiaw ya wa ka sorkar bei da em ko ka thong wow pyndooh noh ya i pynemkaam ya ki Single Use Plastic namo ki Plastic kiwa noh hadien wa pynemkaam chisien iwa da wanrah sakhiat yei eh ya ka bei rymaw khamtam ki um ki wah wei daw booh yei eh ya ka mynried ka Dorbar Chnong, da chim ko ya kani ka luti wow khang noh ya i pynemkaam ya ka Plastic hapoh ka dorbar wei da mynjur lang ki paidbah wa chong chnong. Wei ha ka Dorbar ki paidbah chong chnong da chim ki leh yaka kular (Pledge) wa da yahkhmat da u Peter J Lawai, Sordar Shnong wa ym pynemkaam Plastic chooh.
Ha kani ka sngi da yoh i pynche bniah na u Secretary ka Dorbar Chnong Mawryngkneng u Wanlambok Kharsati ya i pynsih dur ka Plastic ya ka bei rymaw wa ka khooid suba wei da pynchlur u ya ki paidbah wow pynemkaam da kiwi ki laad kam ki sla, ka muna yaw ki muna Organic Bag ki wym ktah ya ka rymaw.
Hadien wa wai katai ka Dorbar da em ka lum Plastic da ki paidbah chong chnong Mawryngkneng ha tymbood u sarok bah.
Ha kani ka sngi u BDO yong ka Mawryngkneng u Roney Wahlang, MCS da wan pait u ya kani ka lum Plastic wei da ynche u leh ya ki paidbah wa kiwa dai dukan ya i ma na ka Plastic wa i pynchitom ya kiwa yaleh pyrchah ya ini wa da khang wow pynemkaam ya ka.
Neiliang ka Dorbar Chnong Mawryngkneng da khut da wer ko ya ki paidbah ka chnong wow ya krehlang waka Dorbar Chnong wei ha i jooh i por da maham leh ya kitu ki bru kiwa na baar wa ki ym toh u wan noh jhep ki ha kiwon kiwon ki bynta yong ka chnong Mawryngkneng.
Ha kawi won ka liang, ka Dorbar Chnong da kyntu ko leh ya kiwa dai dukan kiwa dang em ki Plastic wow wan e kti noh cha ka yung krehkaam u Sordar khnang wa ka chnong u e kti ko cha ka sorkar.
Discussion about this post