Jowai: U Project Director ka DRDA, West Jaintia Hills District, u P.K. Boro, deiwa emlang ka BDO ka Thadlaskein Block ka B. Blah, ynne ka sngi da wai paidbah ki ya u moo sahkynmoo ka madan yalehke ka chnong Sohphoh, West Jaiñtia Hills District, kawa da pyndep pynchna yaka thaw chong kiwa wan paitke yong ka madan lyngba ka Scheme 100 sngi næ ka Mahatma Gandhi National Rural Employment Guarantee Act (MGNREGA).
Ya kane ka Project da tip kam ka Improvement of Play Field, da pynkreh ha i lut kawa poi hadooh T. 19 lak tam wei i pynkreh ya kani ka madan yalehke da sdang nadooh u Duiatra (Jan), 2019 wei da ye u pyndep ha u Naiynru 2019 wei da yoh wow wai paidbah ya ka ynne ka 4 tarik.
Ya ka yalang wai yaka madan yalehke ka chnong Sohphoh da pynlai da u E.G. War, wei da yoh ya i klam na u K. Kharsohnoh, waheh chnong, u F. Kharsohnoh Secretary VEC, u M. Thabah Secretary Chnong wa kiwi.
Ha kani ka yalang da yoh leh ya i klam hajrong ki Scheme waphær waphær kawa tip kam ka Awareness on Various Scheme and Programme at Thadlaskein C&RD Block da ka R. Shylla APO wei hajrong i pyntip wei wow pynsñiawthooh chaphang ka Megha Health Insurance Scheme (MHIS) wa ki Smart Card da klam da u Philimon Bamon DPM, WJHD, Jowai.
Ka BDO ka B. Blah hawa klam da kyntu ko ya kiwa chong chnong wow chimkhia ya i chait i khiah iwa man hakhmat dooh hadien ka roi ka paar yong ka chnong neibhah khlem i chait i khiah ym ye wow leh iyi iyi leh wei na kani ka daw ha kani ka yalang da yoh yei batai hajrong ka MHIS næ ka Smart Card. Da yaroh ko leh ya kiwa pynlai chnong, ki Secretary VEC wa ki paidbah wa da kreh hok ki ya ka kaam lyngba ka Scheme 100 sngi kawa ki da ye ki wow wanrah chiboon ki myntoi ya ka chnong ka thaw.
Neiliang u Project Director u P.K. Boro da kyntu u ya ki paidbah wa ym pynsepai ya kani ka kabu wow kreh mylla 100 sngi ha ka chi snem nalor wa i su leh da ku wei kani ka 100 sngi ym ktah ko ya i por yong ki, neibhah haka chi snem em 356 sngi kamtæ kiwa tam na ka kitai ki sngi ha ka chi snem kiwa chong chnong ye ki wow kreh ya ki yong ki hi ki kaam kam ka rep ka riang wa kiwi de. Da ong u leh wa heiyatoh wa ki Scheme kiwa daw yoh, kyntu u ya ka VEC wow pyndep wei wow pynbiang ya kiwa emkaam wei neiliang ka yung pynkrehkaam yong oo ym pynslem wow leh ya iwa emkaam khnang wow yoh smat ya ki Scheme.
Discussion about this post