Ka sorkar Meghalaya lyngba ka chnat Home (Political) da pynmih hukum ko ynne ka sngi kawa daw krehkaam nadooh ka 5 tarik uni u bnai kam chibynta wow khanglaad yei ku kiwa yoh COVID-19 deilang wa u jait Omicron.
Ka hukum da ong ko wa waroh ki jait yalang nadooh kiwa pynman ka sorkar, ki yong paidbah wa ki seiñ saiñhima da khang wow pynman ya ki. Tangwa ki bia da chah deiwa em 50% na iwa chniam ki bru hapoh ki thaw wa em hapoh yung katwa kiwa pynman cha lait u chah du 100 ngut ki bru.
Hawa em i yap bru daw chah wow em du 50 ngut ki bru.
Waroh kiwa psiah chapoh ka jylla wa kynthup ya kiwa da dep yoh tika pura hap ki wow pynyoo ya ka RT-PCR Negative Report kawa da leh hapoh 72 kynta chwa wow poi ha ka Covid Screening Centre wa em ha ki Entry Point wei lada ym em ya kani daw hap ki wow leh ya RT-PCR Test. Ya kitu kiwa chah Test ha ki Entry Point daw hap ki wow chong kset samen hadooh wa yoh ya ka Report.
Ki kari ki bru samen u chah u lai ki da ki Odd-Even heiwa ki Odd Number u mih ki ha ka sngi Monday katwa kiwa em ya u Even Number u mih ki ha ka Tuesday iwa hap wow bood kamni ha ki sngi wow wan tangwa ha ka sngi Sunday ym hap wow bood yeini wei yeini daw pynmih hukum da ki jar jiar ki DC.
Ka Night Curfew daw pynkrehkaam biang da ki jar jiar ki DC nadooh ka 10 waje i miet hadooh 5 waje i step. Ki kari wa kit mar wa kynthup ya ki mar rep wa ki kari wa leh ya ki kaam sumaar sukhær da pynlait ya ki naka Curfew.
Da phah leh ya waroh ki bru wow bood ki ya ki kyndon yada na u COVID-19 deiwa deiñ ya ki Mask hawa em ki ha ki thaw paidbah wei wow yajngai uwi ya uwi.
Da pynchlur leh ya kiwa da biang i rta wow lai chim ki yei tika.
