U DC ka East Khasi Hills, u Abhilash Baranwal da pynkrehkaam u da ka Section 163 BNSS neidaw wa em i thmu ka KSU wow lai Rally na Jaiaw cha Motphran kawa daw pynkut ha Khyndailad wei heini daw pynman leh ya ka Sit-in-Demonstration nadooh 11:00 waje i step hadooh 6:00 waje i miet ha ka 21 tarik uni u bnai.
U DC da ong u wa lada e bor wow leh ki yeini daw pynthut ko chiboon yei lai i wan, i suk i saaiñ, hadooh i chah ktah ki thaw ki bhaw wei daw booh ko leh hei maa yei mynsien bru.
Kamtæ da pynmih hukum wa ha ki thaw wa haap hapoh ka Sadar Police Station ka East Khasi Hills, da khang wow pynman yalang da kiwon kiwon ki bru næ ki seiñ, u pynman yei lai paidbah wa ki yakhih khlem da yoh bor.
Da khang leh wow yalang 5 ngut næ palat 5 ngut dei thmu wow pynman yakhih wei wow pynthut ya ki paidbah.
Da khang leh wow pynemkaam ki tanghæng, ki Loudspeaker, ki Megaphones, ki Amplifiers wa ki PA System khlem da yohbor.
Da khang leh wow rah ya ki tiar yasiat, ki dieñ, ki moo, ki naar kiwa ye wow pynmynsoo bru, kiwa ye wow tympiah tympra ya ki yung ki sem hawa pynman yei lai paidbah.
Lada chem ya kiwon kiwon kiwa leh pyrchah daw chah pynchitom ki katkam ka Section 223 ka BNSS, 2023.
Discussion about this post