Shillong: Ka District Magistrate, East Khasi Hills District hapoh ka Section 144 CrPC da khang ko ya i tih moo wa pyrchah yaka aiñ ha ki chrooh loom kiwa dang haap ha ki hok yong ki kiwa lai luti (Right of Way) ha ki National Highway kiwa em ha East Khasi Hills District khlem da yoh yaka Quarry Permit kamjooh khlem da yoh yaki Clearance Certificates naki bor sorkar.
Ya kani ka hukum da pynmih neidaw wa em i tih moo ha ki thaw wa dang haap ha ki National Highway tymbud u sarok Shillong Bypass wa kynthup haka chnong Thangshalai wei kamjooh da yoh yaka hukum naka National Green Tribunal, Principal Bench, New Delhi kawa da khang ya kiwon kiwon ki bru, ki Company lane kiwon ki seiñ wow leh ki ya kiwon kiwon ki kaam tih (Quarrying) ha kiwon kiwon ki bynta ka ri khlem da yoh Quarry Permit wa kiwi ki Clearance Certificates katkam wa pynmih hapoh ka EIA Notification 2006 ka MoEF & CC, ka sorkar India wa katkam ki aiñ ka sorkar Meghalaya.
Chooh chooh da ong wa ini i tih mar ha tymbud u Shillong Bypass da wanrah ko yei oor khyndaw wei kini ki kaam lada pteiñ ki daw pynkyllooid ki ya i khyndaw ha waroh ki bynta wa em ki rood sarok iwa ye wow wanrah chooh chooh yei maa nei oor khyndaw wei daw booh ko leh hei maa ya kiwa lai luti.
Lada chem ya kiwa leh pyrchah, daw pynchitom katkam ka Section 188 CrPC. Kani ka hukum u krehkaam ko chisyndon hadooh wa pynmih da kamwi.
