theme-sticky-logo-alt
theme-logo-alt
Advertisement ad1
Advertisement ad1

Da khang wow tih moo, tih chyiap khlem yoh bor ha East Khasi Hills

Ka District Magistrate, East Khasi Hills da pynkrehkaam ko yaka Section 144 CrPC yow khang ya waroh ki tih moo, tih chyiap wa man pyrchah yaka aiñ ha waroh kawi ka East Khasi Hills District neidaw wa da leh ya ini da ki bru kiwa ym em yoh yaka Quarry Permit wa kiwi ki Clearance Certificates na ki bor sorkar.

Ya kani ka hukum da pynmih neidaw wa yoh yei pyntip na u Divisional Forest Officer, East Khasi Hills & Ri Bhoi (T) Division, Shillong wa i tih moo wa tih chyiap pyrchah yaka aiñ da jia i ha thaaiñ Umtyngar, Swer wa tymbud luti hadooh wa poi Sohra, wei da em leh ka hukum ka National Green Tribunal, Principal Bench, New Delhi wa khang ya kiwon kiwon wow leh ya kini ki kaam hapoh ka ri khlem da yoh Quarry Permit wa kiwi ki Clearance Certificates katkam ka EIA Notification 2006 ka MOEFF & CC, ka sorkar India wa ki kyndon aiñ ka sorkar Meghalaya.

Ka hukum da ong ko wa ini i tih moo, tih chyiap ha tymbud ki thaaiñ Umtyngar, Swer kamjooh ka luti wow lai cha Sohra ye ko wow wanrah yei oor khyndaw na ki chrooh loom iwa daw pynkyllooid leh yei khyndaw iwa daw wanrah leh yei maa wow oor chooh chooh i khyndaw iwa daw wanrah kylla yei maa ya kitu kiwa lai luti.

Chooh chooh da pyntip leh wa kini ki kaam wa pyrchah yaka aiñ da jia ki leh ha kiwi ki thaw wa em harood ki sarok National Highway/State Roads/wa kiwi ki thaw wei man ko leh pyrchah ya ki kyndon ka Meghalaya Minor Mineral Concession Rules 2015 (wa kiwa da pynkylla).

Ya kiwa chem wa leh pyrchah ya kani ka hukum daw chah pynchitom ki hapoh ka 188 CrPC. Kani ka hukum toh kawa krehkaam chisyndon hadooh wa pynmih hukum da kamwi.

Share this:
Previous

U e yarap poisa ka sorkar ya kiwa thoh kot dei ktien Khasi wa Garo

Next

Ha ki 3-4 sngi daw pynbait yei dooh thaw noh jhep ka Jowai Municipal Board: DC