U MLA ka 2-Jowai Constituency, u Wailadmiki Shylla ong u wa kam u khynroo uwa da yoo yaka sor Jowai nadooh ki por nachwa, da man ko kawa da neh kamjooh bait khlem iwon iwon i kylla dur, kamtæ heiyatoh wa i angnood yong oo u wanrah i kylla næ i roi i paar da kreh chitom u wow thooh ki laad ki luti lyngba ki chnat krehkaam waphær waphær, kamtæ ynne ka sngi da khana u wa ka sorkar jylla lyngba ka chnat Urban Affairs Department da khut Tender ko neibynta ka Scheme Beautification of Jowai Town næ yow pynyoosuk pynphooh pynphieñ ya ka chnong Jowai hei dor wa da mang T. 12.36 klur.
Heiyatoh wow pynbha pynmiat ya u sarok hapoh Jowai, ong u wym kwah u wow man u MLA wow pynchna bait ya ki sarok man ka san snem, tangwa kwah u wow pynphær yei miat (Quality), da pyntip u wa da dep pynpsiah u haka Smart Road ka World Bank wei kamwa 33 Km u surok daw siang psiang katkam ka juk thymme itæ wym toh dei bor bru tangwa da ki kor (Machine) iwa yahaap katkam u sarok Highway, wei yeini yooluti daw khut Tender ha u Duiatra (Jan) yong u snem wow wan.
Da pyntip haroh u wa ka saam um naka Umngot Project leh wym slem de da ye u pynpoi um cha Jowai, neibhah kamwa man kattæ ka kor taan um namo ka Pumping Machine yong ka Umngot leh da man kawa biang, ka um dapoi ko ha khmat chnong Demthring wei iwa sah katni toh u paitbniah ya ki Pipe Line neibhah toh iwa da dep pyndait da boon snem.
I rukom saam um hapoh Jowai u man i kamjooh hi, neibhah ka um wa wan na Umngot pynkylla ko du kat ka thaw wan ka um najrong wow yoh ya ka um kawa rap khooid.
Heiyatoh wa ka kor taan um kawa pynpoi um cha Jowai kawa katni, u MLA da khana u wa da em i thut ko katni neibhah la 20 snem tam da ka jooh bait, kamtæ da dep pynsñiaw u cha u PHE Minister wei ya kani leh da toh u booh poisa namo wow Sanction heiwa iwa sah sa du u pynpoi u Contractor.
Chooh chooh khana u wa yaka Mini Secretariat leh ha kini ki sngi daw wai mooyurim iwa daw wan hiar u Montri Rangbah da oo hi.
Neibynta u pynlait yaka Jowai nei khynnia heiyatoh wa i lai i wan ki kari, da pyntip u wa ya u sarok Bypass na Khliehtyrchi u wow pynyabi waka yingkieñ Treiongriang hei lut wa T. 97 klur, ya ini leh da dep khut Tender.
