theme-sticky-logo-alt
theme-logo-alt
Advertisement ad1
Advertisement ad1

Da yoh yei thaw noh jhep wa heh 100 Acre neibynta ka chnong Jowai: Wailadmiki

Advertisement ad1
Advertisement ad1

Ynne ka sngi u MLA ka 2-Jowai u Wailadmiki Shylla hawa e yei klam heipor wa saam ya ki Household Bins næ ki thaw pynlang jhep wow pynyakhlaad hapyrdi ki jhep wa pyut wa ki wym pyut cha ki dorbar chnong waphær waphær ka Jowai, ong u wa nachwa heipor waka Jowai Municipal Board dang pynlang jhep hi-eh ko, ym em iwon iwon i awri awra, tangwa ha kini ki por wa dep wada sdang u pynkrehkam yow wanrah yei roi i par lyngba ki Project waphær da mih i awri i pynbaad wa boonjait iwa da sakhi da waroh lang.

“Nachwa boon ki bru pyrkhat ki wa ka Municipal Board toh kawa du kat wow pynlang jhep donhi wei kamjooh i rukom krehkaam i wym paka, tangwa manda lai luti sñiaw yahap hi O ya ki kyntien wa ong, lym leh iyi iyi i chah pynbaad chah kdaw kti leh wym em hi, tangwa manda sdang u kreh yei kaam heitæ wot mih i kdaw kti wa i pynbaad wa kut jait kut sker,” da ong u Wailadmiki Shylla.

Advertisement ad1

Heijooh i por da kyntu u ya ki paidbah kamjooh ki waheh chnong wow lai li mih cha ka Municipal neibynta u yoh myntoi lyngba ki Scheme wa boon jait neibynta yong samen næ ki dong ki chnat.

Heiyatoh wa i thaw noh jhep ha Mynkjai, u Wailad da pyntip u wa da sangeh nadooh ka 14 tarik uni u bnai katkam i yakut, wei da lai li noh cha kawi won ka thaw wada pynkhreh wow man ka thaw noh jhep wa pura.

Neitæ ong u wa da dep chong pyrkhat waki chnat krehkam waphær wa haap hapoh ka Task Force Committee wei ya ka Report wa phah ki cha Shillong leh da pdiang wow man ka thaw noh jhep wa pura ka Jowai Municipal Board.

“Ka thaw wa thymme kawa da yoh toh kawa heh kamwa 100 Acre heiwa ka Jowai ym emkaam de ko u awri yei thaw noh jhep hapoh 50 snem,” da khana u Wailad.

Kamwa man kattæ khana u wa i kaam da lai ko chakhmat wow sdang noh yei su, wei yooluti u wym slem de u pyndep yei su dei wow leh da ka Direct Purchase heithaw wow leh da ka Land Acquisition kawa daw ye u chim por.

“I yoh yei thaw noh jhep ym mut wow noh hi-eh kamwa jooh tangwa da pynkhreh daka Scientific Method wei heijooh i por i em ki kharkhana pynmih khyndaw-bilat haka thaaiñ man i i kyrkhu neibhah wada em ka hukum yong ka sorkar pyrdi wa ki Cement Factory leh toh u pynemkaam ki da ki kynja jhep wym pyut (Non-biodegradable Waste) neibynta u thang Clinker yow pynmih khyndaw-bilat, kamtæ i pynkhreh ya ki thaw pynlang jhep deiwa pynyakhlaad ya ki jhep nadooh na yung u pynsuk ko yaka Municipal chwa wow phah cha ki karkhana pynmih khyndaw-bilat.

Share this:
Previous

Deilang wa ki arngut e yarap u MDC ka Mynsngat-Khanduli da ki kymmor cha ka Children’s Home

Next

Da khut Tender kawa T. 12 klur tam yow pynphooh pynphieñ yei dur ka sor Jowai: Wailadmiki