Ka Bamphalar toh kawi na ki rukom dustur wa da leh da pyndep ha chnong Jowai da ki kattu katni tylli ki dong ki chnat nadooh ki por nachwa, kamtæ ka Tpep-Pale Dorbar Chnong kam chibynta wow pyndep ya kani ka rukom dustur, ha ka sngi Pynsiñ 6 tarik wa ka Mulong 7 tarik uni u bnai da pynman ko ya i lehke Drama ha Yungwalieh hapyrdi i wan sakhilang ki khon ka dong ka chnat kamjooh ki lok ki jor najan najngai.
Kam ka dak i wai ya ka Bamphalar ha uni u snem, da em ka yalang yahkhmat wa tbian hei pynlai u EMH Passah kam uwi na ki waheh wasian katwa u Robinus Syngkon, MDC-JHADC da man u kam u kongsan.
U Robinus Syngkon hei klam yong oo da yaroh u ya ka Dorbar Chnong Tpep-Pale wei da kysru kyntu u leh deiwa ong, to u nangyaleh chooh wow pynchlur bha ya ki khon khynroo khyllood wow mih ya chimbynta ki ha i lehke Drama ha kam ini i por khnang yow im u neh u sah kani ka rukom dutsur wa pynyoo yei man kyrpang yong ka hakhmat ka pyrthai.
Ki ar tylli ki Drama kiwa da yoh laad ki khon khynroo khyllood ka Dorbar Chnong Tpep-Pale deilang ki manbei manpa u ya pynyoo pyntawsap toh ka Drama Comedy wa pyrtuid Ri-Iaw kawa da pynrkhai pynka-it ya ki paidbah nei stat kiwa ak ha deilang i yahaap ka parom.
Ka Drama wa ar won wa pyrtuid “Haka Spah Wym Chong Tre” toh kawa da Direct da u R. Daoo Syngkon wa u Raishan Dkhar.
I parom yong ka iwa yatoh wa i lai kylliang ha ki ar manyung, heiwa u chynrang waheh da pynbiej u da ka spah yaka payu ka kynthai yow yoh cha oo da ka sdiah, katwa u diah yong oo won yow lai u wa ka waheh.
Wei utai u waheh najrong wa man haroh uwa kyrni hei dih drug, da pynbiej u leh kut jait ya ki khynnah wa hapoh 20-25 snem tang yow yoh u yeiwa mut wa thmu yong oo.
Discussion about this post