15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Da ki hajar tooid ki paidbah yow beiñ yei chah slaitbor, chah pynyap kawa dang 5 snem ha Priang

0 Comments

Jowai: Ynne ka sngi ka KSU Laskein Circle da pynman ko ya ka Rally namo ka lai paidbah nadooh na Priang chadooh cha Iawpyngkat Iooksi heiwa da ki hajar ngut ki paidbah da mih lang ki wow lai kjat lang.

Kani ka lai paidbah man ko kam chibynta wow beiñ joor ya i chah slaitbor wa i chah pynyap ka khynnah wa dang 5 snem ha ka 17 tarik uni u bnai ha chnong Priang, WJH.

Ha ini i lai paidbah da emlang u Ohibait Dkhar President ka KSU-JHDU, u Danny Shadap Vice President ka FKJGP West Jaintia Hills, kiwa yahkhmat ya ki chnong ka thaaiñ Iooksi, ki seiñ manbei, ki bru paidbah wa kiwi kiwi.

Hadien ka ya lai paidbah da em ka yalang paidbah ha Iawpyngkat Iooksi kawa pynlai da u Nangaibormi Sutnga, uwa e buit ka KSU Iooksi Unit.

Kiwa e yei klam ha ka yalang toh u Balawan Suchiang, President ka Iooksi Unit uwa da ong wa kam ka seiñ ka dap ko dei sñiawkhia ya ini i jia kawa da ktah yei pyrkhat pyrdaiñ ya ka jaitrbu ka yong i. “Kam ini i jia toh iwa ka imlang sahlang ym ye ko u pdiang da kammon kammon leh wei daw phah dei thoh cha ka sorkar kawa daw soi lang ki waheh chnong ka thaaiñ waka KSU yow dawa naka sorkar wow chim da ka rai wa khor pyrchah ya uwa emkti ha kani ka kaam uwa ym em de i sñiaw yong bru wot ya ka khynnah wa dang 5 snem.” da ong u Balawan.

Katwa neiliang u Danny Shadap uwa yahkhmat ka FKJGP won da ong u, “U Dawanbiang Langstang toh uwa da yap i mynsien tip bru wei ym kwah i wow mih biang kiwi ki Dawanbiang kiwa khyllah haka thaaiñ wa ka jaitbru ka yong i.”

U Ohibait Dkhar da ong u wa i thombor ya ki khynnah khian hapoh ka jylla ka yong i dang ku ko na kiwi ki por cha ka kiwi. Kamtæ man ko ka kamram yong ka sorkar wei kamjooh yong kiwi pa kiwi kiwa chong chnong wow ksohkti lang ha kam kini ki por yow pyndooh noh ya kam kini ki kaam pohjait pohrati.

Kiwi de kiwa klam ha kani ka yalang toh u Nehemayah Tyngkan, u Rikut Parien Ex-JSU President, ki manbei wa kiwi kiwi de.

Previous
Next

0 Comments

Leave a Reply