15 49.0138 8.38624 1 0 4000 1 https://wyrta.com 300 0
Advertisement ad1

Da ki hajar tooid kiwa kyrchaan u Nehemayah Tyngkan ha ka yalang ka 13 CEC
Wan yalap u Vincent H. Pala ya u Tyngkan ha Saphai

0 Comments

Jowai: Ka yalang paidbah yong ka 13 Chnong Election Committe yong ka 4-Mowkaiaw Constituency wa da pynman ha Chnong Saphai, da wan tooid da ki hajar ngut kiwa kyrchaan ya u Nehemayah  Tyngkan uwa man kam u kyrtong na 4-Mowkaiaw Constituency ha kani ka Election MLA 2018.

Kani ka yalang toh kawa da pynman kyrpang neibynta kiwa kyrchaan ya u Tyngkan kiwa na ki 13 tylli ki chnong nadooh na Biar tymbud u sarok hadooh wa poi ha Garampani heiwa da wan sakhi leh da ki kattu katni ki waheh na ka chnong Mowkaiaw, Muchrot, Chilliang Myntang, wa kiwi kiwi.

Ha kani ka yalang da pyllai da u B. Lyngdoh uwa man leh kam u Chairman ka 13 CEC.

Uwi na ki waheh na Pohkseh, u D. Paslien hei klam da ong u wa da kot u yoo yei saja wa yachem ki paidbah ka thaiñ khamtam hawa lai wa wan neibhah wa u sarok da man u uwa sih bha katni khlem em de i chna pynmiat ya oo neidaw wa kheiñstiñ kiwa mihkhmat.

U Barley Rymbai na Umsalait hei klam da ong u wa ym emkaam ya ka party tangwa emkaam ya u bru uwa kreh ya kiwa dooh ki kup chilliang sem chilliang; u jied da uwi donhi wei lada yoo wa ym kreh u katkam wa da kular wei toh u kreh u ha u 2023 su tyngkheiñ noh ya oo.

Kawi na ki manbei na Iooksi ka Marjo Lyngdoh hei klam da ong ko wa u Nehemayah toh u man u u bru kam i pyrtuid yong oo iwa mut wow tei yeiwa da jæd da pra.

U MP ka Shillong u Vincent H Pala hei klam da ong u wa ymtoh u Nehemayah wa wan paan ya ka ticket ka Congress tangwa ka Congress hi wa tyrwa ya oo ya ka ticket wei oo (Pala) wa tyrwa ya ka. Da ong u leh wa ha u Nehemayah yoo u wa em sakhiat itæ i mynsien wow kreh neibynta wow wanrah ya i roi i paar kamwa da thrang wei angnood ki paidbah.

Heijooh i por da kular u leh wa lada man katwa man hi u e yarap u ya u Nehemayah liang wanang ha kani ka Election 2018 khnang wow ye u u poi cha ka thong.

Kam u Kyrtong u Nehemayah hei klam yong oo ha kani ka yalang da ong u wa ka Mowkaiaw Constituency emkaam ko chiboon ki Vitamin wei wow kiar na ka Vitamin M namo ka poisa ‘Money’ deiwa pynrap wa heipor Election boon kiwa pynjoor du i kular wei oo hi samen ym saam u ya ki scheme lyngba ki Leader yong oo tangwa na oo ha ki paidbah bait sak næ.

“Ham ong ya nga u Blai San Snem neibhah em du uwi u Blai wei nga man O u chakri uwa daw jied phi neibynta yong phi hi,” da ong u Tyngkan.

Heijooh i por da kyntu u ya waroh wa ymtoh u jied ki neibynta yong ki hi-eh tangwa u jied ki neibynta kitu waroh kiwa em hapoh 18 snem i rta kiwa man ka mynried ka ri wa ka jaitbru wei elaad wa ka mynried yong ki u man ko kawa tyrchaaiñ.

Da klam u leh chaphang i yoh khih yoh kreh heiwa oo ym thung kreh u ya ki bru tangwa u thooh laad thooh luti u wow e ya ki u symbe yow im ki waroh chi rta.

Da pynkynmoo u ya ki paidbah wa ka Laskeiñ da pynman ya ka kam ka C&RD Block ha u snem 1973 wei em kiwa yoh yakani ka kyrdan ha u 75, 76 wei ki da man ki Civil Sub-Division wot hadooh kam ki District deiwa beiñ ya kiwa mihkhmat kiwa ym em u chynna jngai yeiwa emkaam ka thaiñ waroh kawi.

Advertisement ad1

0 Comments

Leave a Reply