Ampati: Ka Mega Health Mela wa ar sngi wa pynman da ka District Health Society ka South West Garo Hills ha madan ka Sonamite LP School, Ambari hajan ka Garobadha da kut ko ynne i janmiet kawa pynman hajrong ka thong “Achieving Safe and Healthy Future”.
Kamwa chi hajar ngut ki paidbah na ka thaiñ Sonamite, Ambari wa ki chnong ka wa marjan da wan chim kabu ya kani ka e dawai mynkna ha kini ki ar sngi.
Ha kini ki ar sngi da wan ki Doctor Specialist na Tura Civil Hospital wa kiwi ki Doctor napoh ka District kam ki Eye Specialists, Gynaecologists, Dentists chirup wa ki Doctor Homeopathy wa ki Doctor Ayush.
Nalor i sylli mynkna ya kiwa kjut wa i e dawai mynkna da pynman leh ka esikai ya ki kynthai wa punkhon, i chait i khiah ki khynnah wa dang khai khynroo, ka pynyoo rong ya ki khonboo wa chait wa khiah, ka ya phyllu yumut heiyatoh waka MHIS wa kiwi kiwi de.
Ha ka sngi wa ar da pynman leh ya ka lai paidbah namo ka Health Rally kawa da chimbynta da ki spah ngut ki bru wa kynthup ya ki sahep ka tnat ka chait i khiah, ki ASHA, ki Nokma, ki dkhot ki Village Health Committee deiwa lai kjat na Garobadha PHC cha ka thaw wa pynman ya ka Health Mela.
Ha ka step wa sdang ya kani ka Health Mela u Dr. Debashish Sarkar (M.D.) da klam u yei ktah ka kjut ka chitom khamtam ya ka poisa kiwa haap chah sumaar, kamtæ da ong u wa na ki por cha ki por emkaam wow lai phah leh ya ka “Medical Check-up” yow chem ya ki kjut chwa wow dier i por.
Ka District Medical & Health Officer, Ampati, ka Dr. K. A. Sangma da klam ko ya kiwa boon ki jait ki Scheme sorkar kiwa em hapoh ka tnat ka chait ka khiah wei da kyntu ko leh ya ki paidbah wow chim kabu ki ya ini.
U SDMO, Ampati, u Dr. Calvaryn K. Sangma, Gynaecologist ka Tura MCH, u Dr. Rimse Arengh wa u Medical & Health Officer, Betasing PHC, u Dr. Finlay Marak toh kiwi kiwa da klam ha kani ka sngi.
Discussion about this post