Jowai: Ka Apollo Tyres da e yarap ko da ki Jersey yalehkebol cha ka Ladthadlaboh Dorbar Chnong, kawa chimbynta u yalehke ha kani ka samoi yong ka kyrdan 1st Division Football kawa pynman da ka West Jaiñtia District Sports Association (WJDSA).
Ya kini ki Jersey ka Apollo Tyres da ekti ko ynne ka sngi ha ka yalang wa tbian wa pynman ha yung krehkaam ka Dorbar Chnong heiwa ya ka yalang da pynlai da u FC Chyne, Chairman ka Sports Committee hei emlang u Area Manager ka Apollo Tyres u Embhah Dkhar, u Blooming Lytan, Dealer yong ka Apollo Tyres (Lytan Automobiles), u Acting Waheh Chnong ka Ladthadlaboh Dorbar Chnong u Russel Nongrum, Symbood Waheh Chnong u S. Bareh, u General Secretary ka Dorbar Shnong u ABM Shullai, u Sports Secretary u Helpme Shylla wa kiwi kiwi ki khynnah yalehke Football ka chnong.
U Embhah Dkhar hawa e yei klam da ong u wa i thmu yong ka Company wow e sñiawbha da kini ki sula Jersey toh wow e mynsien wei wow pynchlur ya kiwa yalehke Football ka Ladthadlaboh SC deiwa pynrap wa ka Company ha kylleiñ ki ri ka pyrthai em ki ka bynta wow kyntu kynrong ya ka kaam yalehke Sports wei kani man ko ka sien wa nyngkong wow leh kamni ha kani ka thaaiñ.
Da ong u leh wa hanlada ini i e ka Company man i iwa khian tangwa kyrmen skem u wow pdiang ki yeini i e ka Company wei wa yooluti u leh wa daw ye chooh u krehlang kamni chirup ha ki por wow wan.
U Acting Waheh Chnong ka Ladthadlaboh Dorbar Chnong u Russel Nongrum da ong u wa i pynlut ka dorbar chnong ha ki kaam yalehke Sports man i iwa boon wei chem chitom ko wow pynmih poisa wow kyrchaan ya ka kaam yalehke ki khynnah ka chnong. Da e khublei u leh ya u Area Manager ka Apollo Tyres wa ki Dealer ha Jowai yei smat ki wow kyrchaan yarap ya ka chnong deiwa kyrmen wa kani ka Company u dang e kyrchaan chooh ko ya ki kaam yalehke ha Ladthadlaboh.
U General Secretary ka Ladthadlaboh u ABM Shullai da ong u wa ka Dorbar Chnong katkam wa joh i bor ym jooh khanglaad ko ya ki khynnah ka chnong wow chimbynta ha ki kaam yalehke khnang wow ye ki wow kiar na ki jait kaam wa sih kiwa da roi ha ka imlang sahlang, wei iwa chem chitom dooh toh ha ka liang ka poisa poilaiñ.
Discussion about this post