Ka Women’s League kawa tip leh kam ka Late Mary Tlang Memorial Trophy wa pynman da ka East Jaiñtia Hills District Football Association neibynta ki kynthai wa yalehbol ka East Jaiñtia, da poi noh ko cha wakut da ka yakhun Final ynne hapyrdi ka Dkhiah West SC waka Deinchynrum.
Kani ka lympung yalehbol man ko kam wow pynsahnaam yei pyrtuid ka (L) Mary Tlang kawa man ka manbei wa nyngkong wow pyntih mooyong ha thaaiñ Jaintia hapoh i pynyoo luti uwi u Muslim wa chongkha ha Wapung uwa jooh khut maya kam u Phooh Nioohlieh uwa deiwa yoo yei dooh kani ka manbei da hikai u ya ka wow tih ya u mooyong wa em ha i thaw yong ka.
Hawa kyruiñ cha ka yalehke ki kynthai, ka Deinchynrum SC da jop ko yaka Dkhiah West SC da 3-0 da ki kool wa thap mar kawi ki 3 ngut chi payu kawa da thap nyngkong da ka Alisha Lyngdoh (8 minit), Happily Lyngdoh (60 minit) waka Deimon Lyngdoh (70+1 minit).
Yei naam Player of the Day da yoh da ka Alisha Lyngdoh kawa yalehke ka Deinchynrum, yei naam Emerging Player da yo ka Pari Khongngain yong ka Dkhiah West SC.
Da yarap wow saam ya ki khusnaam da u Welbert Nongtdu, Waheh Chnong ka Deinchynrum SC wa u James Sutnga, Working President, EJHDFA.
Ya ka Trophy cha kiwa rem da yarap wow saam da ka Merun Tlang kawa man ka ksu wa nyngkong ka (L) Mary Tlang.
Ya Trophy cha kiwa jop da saam da ka Pawlina Tlang, ka khon yong ka (L) Mary Tlang.
Ha kani ka sngi da em leh ki waheh ka kur Tlang kam u Treyo Tlang, u Tommyna Tlang, u Coming One Joy Tlang waka khon nyngkong ka (L) Mary Tlang, ka Embris Tlang wei da ya emlang leh ki khon ki ksu wa ki khon miaw yong ka.
Da pynchongchit leh ya kani ka sngi deiwa ya em kiwa kitkaam wa ki dkhot ka EJHDFA, ki manbei wa ki khynroo khyllood wa wan synraan ya kiwa yalehke.
Discussion about this post