Chibynta ka World Zoonosis Day kawa jooh leh warom khlieh u snem ha chityllup ka pyrthai, iwa yatoh hajrong ki jait kjut wa yabi na ki mrad cha ki bru, ynne ka sngi ha West Jaintia Hills District leh da kynmoo ya kani ka ka sngi ha ki Centre waphær waphær yong ka chnat Veterinary deiwa leh jar jiar i bynta, katwa haka yalang wada pynman daka District AH&Veterinary Officer Jowai ha yung krehkaam u District Veterinary Officer Mynthong Jowai, da saam ki daki kor ah phlang, ah jhoor (Chaff Cutter) cha ki warep wa kiwa ri mrad ka District kam chibynta kani ka sngi.
U Dr. H. Niang AH&Veterinary Officer, V/U Jowai, khana u wa ya kani ka kor ki warep emkaam u su ki du T. 1500 deiwa yoh ya ka Subsidy, na i dor tre yong ka iwa da palat yaka T. 10,000, da ong u wa kani ka kor pynsuk ko chiboon hei wow ah næ tylliat yaki phlang ki jhoor neibynta yow e baam mrad wa ri, wei heijooh i por leh yarap ko ha kiwa boon ki bynta yong ki warep, nadooh ki kaam rep wa ki kaam psan mrad.
U kongsan yong kani ka sngi u Dr. K.B. Sahkhar, Director ka AH&Veterinary, Meghalaya Shillong, hawa e yei klam ong u wa kani toh ka sngi wa kynmoo yei kaam wa khroo wada leh daki Scientist wei uwi na kitæ toh u Louis Pasteur, uwa man uwa chem yei dawai wow yada nei chah dait ksaw wa biej yow yada nei kjut Rabies.
Hawa kyruiñ u cha ki ar snem wa waroh ka pyrthai da maad ko yaka khlam COVID-19, ong u wa em i yatoh wa jan bha yong ka khlam COVID-19 wa kiwi won ki jait kjut wa tip kam ki Zoonosis neibhah wa yabi ko na uwi cha uwi won.
“Ka Zoonosis toh ka jait kjut wa yabi na ki mrad cha ki bru katwa ha u COVID-19 leh em hi i yatoh neibhah wa sdang u naki mrad hi. Kamtæ ha kam kini ki por emkaam bha ya ki bru haka imlang sahlang wow tip yaki jait kjut wa yabi khnang yow tip yei kaamram wa toh u leh neibynta u pynduna ya ki kjut wa yabi,” ong u Dr. Dr. K.B. Sahkhar.
Kamwa ka phang pyrdi yong uni u snem ong ko “Let’s Break the Chain of Zoonotic Transmission” kyntu u wow emlang i bahkhlieh hajrong wow pynkut noh ya ki jait kjut wa yabi. Ong u wa ha kam ini i por lada pait yei man i long ka pyrthai na u COVID-19, emkaam hi wow yakrehlang neibynta u pynduna wei pyndooh syndon, itæ toh wow chim tika wei ym toh wow ngait haki khubor thok, neibhah i pyrchang ka sorkar kamjooh ki Scientist yow thooh yei buit stat wa kammon u yakhun wei da chem ki wa ka laad toh du i tika donhi.
Hawa kyruiñ won u chaka kor (Chaff Cutter) kawa da saam ynne ka sngi, ong u wa kani toh ka sien wa nyngkong wada wanrah lyngba ka sorkar bei hachwa wow lehkmen yei dap 50 snem i yoh jylla, wei ha uni u snem da mang u saam cha kamwa 1000 ngut ki warep wa emkaam bha ya ka.
Da khana chooh chooh u wa katni dang chna Project haroh ki, wei ha u snem wow wan lada ka sorkar bei ye ko u kyrchaan poisa daw e biang sa kawi won ka jait kor wa ye u pynemkaam syndon dei bordiñ wei rap syad ko.
Najrong wa kyntu u ya kiwa yoh myntoi wow sumaar bha ya kini ki kor khnang yow pynmyntoi ki neipor chei por, kyntu haroh u ya ki warep wow chim kabu ki yaki Scheme waphær waphær, kamjooh leh ka Scheme heiyatoh wow thung ya ki jait thung wa emkaam neibynta ki mrad wa ri, ki wym du wa yoh mynkna ki yei symbe wot neibynta i lut i sep hawa rep kamjooh.
Kiwi won wa e yei klam kynthup ya ka Dr. A. Laloo Joint Director, ka Dr. E. Passah Senior AH&Veterinary Officer Jowai, haka yalang wa pynlai da u Dr. I. Kjam, District AH&Veterinary Officer Jowai.
Ha kani ka jooh ka sngi da em leh ka yalang pynsñiawthooh hajrong i kjut Avian Influenza & Biosecurity Measure kawa da pynman ha Poultry Farm Mooralong wa da pynche daka Dr. E. Passah Senior AH&Veterinary Officer, Jowai In-charge Poultry.
