Ynne ka sngi u MDC ka Saphai Sahsniang, u Rikut Parien hadien wa yoh ya ka ujor na ki khynnah wa yaleh Domicile Certificate wa slem u yoh ya ka wei da hap ki wow yieñ u yang da ki kynta khamtam kattæ hadien wa khut kreh ka BSF kattæ, da lai yachem u ya u DC wa u SP ka West Jaiñtia Hills.
Hei yaklam, neiliang u DC da kular u wow pynsmat katwa ye u leh yeini deiwa phah chooh chooh ya kiwa kreh wow yarap ha ini i kaam.
Da ong u leh wow pyrchang u pynyoh ya kini ki Certificate ya waroh kiwa pyndap hachwa ka 5 tarik u Naikhynde deiwa pynrap leh wa neini chakhmat ka yung krehkaam daw pyntip ko ya kiwa chong chnong khamtam ki khynroo khyllood u pyndap ki Online ya waroh ki kot ki sla wa emkaam heipor wa thooh khih thooh kreh yow lait u jia kamni.
Neiliang u Rikut da kyrpaad u ya ki khynroo wow man kiwa yaichah wei ymtoh u khuslai ki wei wow pynkhreh ki ya ini i kreh wow yakhun ki.
Da kitbok kitrwiang u ya waroh ki khynroo, wei da kyrpaad u ya ki wow chim ki ya kani ka kabu wow yoh kreh kamjooh wow yada ya ka ri.
Discussion about this post