Da ki moo khang ka chnong Mawtap pyllun ya u sarok neidaw wa sangeh i kreh ha ki luti lai kjat

Shillong: Kam chibynta wow pynsñiaw yei pyrchah ya i rai yong ka tnat PWD wow pynsangeh ya i chna ya ka luti lai kjat ha rood sarok bah yong ka chnong Mawtap Pyllun (Sohiong) lyngba ka scheme MGNREGS, ki paidbah wa chong chnong kiwa em pyrtuid kam ki wakreh kani ka scheme da mih ki wow khang wei ym chah lai ki ya ki kari na kani ka sarokbah.

Ini i khang sarok da neh i kattu la le sngi wei ki paidbah chynrang wa kynthai da kah ki da ki moo hapyrdi sarok wow khang i lai luti ki kari wei da booh leh ya ki kot rben kiwa da thoh ya ki kyntien wow dawa pynche na ka yungkrehkaam u Executive Engineer, Public Work Department (Roads), National Highway Division, Shillong hajrong i pynsangeh wow kreh ya kani ka luti lai kjat.

U A. War uwa man kam u Sordar kani ka chnong uwa man leh ha i jooh i por u Chairman Mawtap Pyllun Village Employment Council (VEC) da pyntip u wa katwa ka Mawtap Pyllun dang em ko heipor wow chna pyndep ya kani ka luti lai kjat kawa da mang poisa na ka Scheme ka MGNREGS, ka tnat PWD da hukum ko ya ka chnong wow sangeh ya i kreh kawa ka tnat PWD da e bor ko wow kreh ha u snem wa da dep.

U Sordar da pyntip u leh wa ha u snem 2016 da paan bor ki naka PWD wow pynkreh ya kani ka luti lai kjat tangwa syndet syndet won ka tnat katni da khang ko wow kreh khlem da pynche ya i daw, wei neiliang ka VEC da lai yahcem ko ya u Executive Engineer u WR Lyngdoh uwa da kular wow pynbait ya ka kaam du hapoh ar sngi donhi tangwa hadooh katni ym em won mih cha kani ka thaw wei da pyntip leh wa uni u Engineer da klam kyllaiñ bha u heiwa ka chnong ka lai yachem ko ha kamra krehkaam yong oo.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Chooh chooh u Sordar da ong u wa i thmu wow chnna ya kani ka luti lai kjat wow yada ya kiwa lai wa yeiñ ha kani ka sarok khamtam ki khynnah skur wa ki tymmen kiwa lai wa wan man ka sngi lyngba kani ka sarok.

Ha i jooh i por da ong u wa ini i leh yong ka PWD da booh ko hei eh ya kiwa kreh da ka Job Card ka chnong kiwa em 58 ngut, wei nei sahkut i kreh da sah leh ka bai nongsngi.

Ka chnong Mawtap ka em ko kamwa 58 tylli ki manyung wei i khang wow kreh da ktah ko ya kiwa lai lyngba kani ka sarok neibhah kani ka sarok em ko hapyrdi wa mih na Sohiong cha Mawngap wei jrong uni u sarok kamwa 20Km.