Kat dang mih ki sngi i poor ka khlam COVID-19 dang joor i, wei hajrong kani ka yurim ka seiñ Art of Living-Jaiñtia Hills Unit kam chibynta wow pynkhlan ya i chakri ka Jowai Civil Hospital, Ialong da e yarap sñiawbha ko da le tylli ki Oxygen Concentrator wa kiwi ki tiar sumaar wa kynthup ya ki Oxymeter, Thermometer wa kiwi kiwi cha kani ka thaw sumaar wa heh dooh ka sorkar ha Ri-loom Jaiñtia.
Ya kini ki tiar da ekti ha ka Superintendent ka Jowai Civil Hospital, ka Dr. R. Pohrmen da u P. Toi uwa man kam u President ka seiñ hei emlang u Rastar Rymbai, Secretary ka seiñ, u Kamnipaia Challam uwa man kam uwa esikai ka seiñ, u DH Pde uwa man kam u dkhot wa kiwi kiwi.
Neiliang u Toi da ong u wa ya kini ki tiar da e yarap sñiawbha da ka seiñ hadien wa yoh yutip ko wa em i duna tiar ha kani ka thaw sumaar wei hajrong ini neiliang ka seiñ da chimkhia ko wow booddien wow thooh ya ki laad yarap khnang wow ye chooh chooh ko u pteiñ i e chakri cha ki khon ka Ri-loom Jaiñtia waroh kawi.
Da pyntip u leh wa ya kini ki tiar sumaar da e kyllooid mynsien cha ka seiñ da ka International Association for Human Values (IAHV) kawa man ka seiñ wa yakrehlang wa ka Art of Living wei ya kawi won ka kor Oxygen Concentrator da e sñiawbha da ka InCred.
Neiliang ka Dr. Pohrmen da e khublei ko ya ka seiñ kamjooh leh ya ka IAHV wa ka InCred kiwa da wan chaphrang kam ha ini i por wa em ka khlam COVID-19 wei i yoh kani ka thaw sumaar ya kini ki tiar man i kam i kyrkhu.
