theme-sticky-logo-alt
theme-logo-alt
Advertisement ad1
Advertisement ad1

Lada maya i ya ka yung ka sem wa ya ki janyung, emkaam wow chim tika: Lahkmen Rymbui

Advertisement ad1
Advertisement ad1

Kat dang mih ki sngi i poor u khñiang khlam COVID-19 dang joor i hapoh ka jylla kamtæ neiliang ka sorkar hajrong ki kyndon yada na uni u khñiang kjut da pynchlur ko leh ya ki bru wow wan chaphrang wow chim ya i tika yada na uni u khñiang. 

Ha kani ka kynti neiliang u montri ki kaam pohyung ka jylla, uwa man leh u MLA ka Amlarem Constituency, u Lahkmen Rymbui da wan u chaphrang wow kyntu ya ki paidbah deiwa ong wa hapoh ka Amlarem Sub-Division da em palat 50% kiwa da wan chim tika tangwa emkaam rap boon chooh chooh kiwa chim ya ini i tika neibhah katkam wa man ha ini wadep kiwa boon dooh kiwa chah ktah ha kani ka khlam ha West Jaiñtia Hills toh hapoh ka Sub-Division.

Advertisement ad1

Da ong u wa dei kreh chitom ki Doctor, ki bor chnong wa ki bru da ye wow khang yei poor kani ka khlam tangwa kattu da toh i por wow chim tika heiwa hapoh ka Padu Dispensary kiwa chim tika da em ki palat 30%, ha Nongtalang CHC da em palat 50%, katwa ha Pdengshakap wa Jarain PHC dang duna bha ki kamjooh leh ha Mustem Sub Center wa ha Khliehtyrchi CHC.

Hajrong ini da kyntu u ya ki bru wow wan chaphrang wow chim ya i tika deiwa ong ha ymtoh u wyrchaw ya u COVID-19 wa kiwi ki jait kjut neibhah wa u COVID-19 poor u cha kiwi ki bru katwa kiwi ki jait kjut kam ka Cancer wa kiwi kiwi won ymye ki wow poor cha kiwi wei neh ki ha i doh uwa chitom donhi. 

“Lada maya i ya ka yung ka sem wa ya ki janyung, emkaam wow chim tika yada COVID-19,” da ong u Lahkmen deiwa kyntu leh ya ki paidbah wow wan ki chaphrang wow chim ya i tika.

Da pynkynmoo u leh wa hadooh ka 3 tarik uni u bnai da em hadooh palat 26,000 ngut kiwa ympu chim tika hapoh ka Constituency, kamtæ da rai u wa kiwon kiwon kiwa wan chim tika nadooh ka 5 tarik uni u bnai hadooh ka 15 Naisaphra daw e u 5 kilo u khoo samen. 

Chooh chooh da kyntu u wa lada em kiwa yoh yei sñiaw wa iñ-doh næ synrum (Flu) emkaam wow pyntip cha ki Doctor wei ymtoh de u yakhleh wa kiwi hapoh yung neibhah kamwa da sakhi hapoh War Jaiñtia da chem wa chah ktah waroh chi yung na uwi donhi uwa chitom chwa. 

Heijooh i por da ong u wa deiwa chim tika ki bru waroh, kyrmen u wa daw ye u wai biang ya ki skur, ki yung mane, ki yaw ki haat, wa kiwi kiwi u man biang i kamwa nachwa. 

Da kyntu u leh wa wot hadien wa da chim tika waroh ar sien leh dang emkaam hi wow bood ya ki kyndon yada COVID-19.

Share this:
Previous

Em i ya sñiawthooh bakla kiwa chong chnong te mih i ya kajia ha Iongkhuli: Dasakhiatbha

Next

Da ki Oxygen Concentrator e yarap ka Art of Living ya ka Jowai Civil Hospital, Ialong