Heiyatoh wa i emkti ki 3 ngut ki chynrang kiwa da wanlang cha Sohra yow pynyap ya u Raja Raghuvanshi, neiliang u Deputy Inspector General (DIG) of Police ka Eastern Range, u Davis NR Marak (IPS) da khana u wa da pynemkaam da 3 tylli ki Scooty wa da chim wai na Shillong yow lai cha Sohra, kawi toh kawa pynemkaam da ka Sonam wa u Raja Raghuvanshi, katwa ar tylli won da pynemkaam da ki 3 ngut kiwa emkti wow pynyap ya u Raja.
Da khana u hadien wa chem ya u kpeiñ Mangalsutra (u kpieñ wa deiñ ki kynthai wa dang dep bia) na ka synduk wa da ieh ki ha kawi ka Suitcase ha kawi ka Homestay ha Sohra, da pynlyngngoh ya ki pulit, neibhah kammon ka bru wa dang dep bia wot u ieh ko ya uni u kpieñ uwa da deiñ bait katkam wa ngait ki Hindu wow pynyoo ya ka kular kam ki chi kurim, kamtæ da ngam yillu ha ka takit wow suba wa emkti ka Sonam ha ini i kaam khamtam hadien wa chem yei metyap u Raja kamjooh ka wait wa da pynemkaam wow leh yeini i kaam.
U DIG da ong u leh wa sa kawi kawa da pynsusba toh hawa ki pulit da pait ki ha ki Social Media kini ki ar ngut, ym em yoo ya kiyi kiyi ki dur wa da booh wa chondur ki deilang heini i por wa lai Honeymoon ki.
Hawa kylli, u DIG da ong u wa kamwa mih kattæ wa da man ko kam katæ ka Love Triangle tangwa daw ye u pyntikna yeini hadien ka takit.
Hawa kylli chooh chooh, u Marak da khana u wa hadien wa dep u pynyap ya u Raja, waroh 4 ngut da yut smat ki hadooh ha Mawkdok da ki Scooty heiwa heini ka Sonam da chim ko da ka Taxi.
U DIG da ong u leh wa ya ka Scooty wa chim wai da u Raja wa ka Sonam ye u man uwi na ki 3 ngut ki chynrang wa lai booh u ka cha Sohra Rim wei da lai won ki cha Shillong da ki ar tylli ki Scooty.
Discussion about this post