Jowai : Ynne ka 10 tarik ki khon ka Elaka Mynso da wan e khublei khaddooh ki ya u Dolloi yong ki u ma Risein Pan uwa da khlad ha kani ka 8 tarik.
Hachwa wow lai pyndep ya ka niam wa khaddooh ya oo ha Loomthang ka kur Pan da em ka yalang tbian ha yung khon yong oo ha Mynso Wahchnong A.
Ya kani ka yalang u ma W. Shylla da man u kam u chongknor heiwa da yoh yei klam na u Ma Ronal Pan, u Secretary ka SMC u ma S. War, na u Secretary ka Dorbar Elaka u ma M. Dkhar, na u Dolloi (Acting) ka Elaka Changpung, wa kiwi kiwi.
Kiwa klam da e khublei ki ya u ma Risein wa man u u bru uwa e yarap cha kiwa emkaam ya oo wei da ong ki leh wa i khlad syndet yong oo da man i i dooh wa khroo ym du ya ka Elaka tangwa ka ri-loom Jaiñtia hi waroh kawi.
U ma Risein Pan da jied ya oo kam u Dolloi ha ka 21 Khonchonglad (November) 1988 wei da thung ya oo kam u Dolloi ha ka 3 Kmaichonglad (December) 1988 wei da yoh u ya ka sanad n ka JHADC ha ka 18 Thohlakhmi (February) 1989.
U ma Risein man u leh kam u Chairman ka SMC yong ka Lumaitwieh LP School.
Discussion about this post