Ka Job Mela ka Deen Dayal Upadhyaya-Grameen Kaushalya Yojana (DDU-GKY) Meghalaya kawa em hapoh ka Ministry of Rural Development (MoRD) da pynman ya ka haka 3 tarik uni u bnai ha Bosco Pnar, Jowai heiwa da man ko kawa jop deiwa wan 300 tam ki khynroo khyllood kiwa thooh kreh heiwa da em leh 19 tylli ki Company kiwa da emlang ha kani ka sngi kiwa thooh bru wakreh kamjooh leh wow pynsñiawthooh ya ki jait kreh wa lait ha ki.
Da wan wow wai ya kani ka Job Mela da u MDC ka Jowai North, u Brightstar Chyrmang deiwa emlang leh u Fr. Francisco Dhar, Director Bosco Pnar.
Neiliang u Frank Joshua Lyngdoh, District Program Manager DDU-GVK, West Jaiñtia Hills hawa khana chaphang ka DDU-GKY Meghalaya da ong u wa kani toh ka Scheme yarap e sikai namo ka Skill Training yow yoh yei sap kreh wa boon jait kawa kyrchaan da ka Ministry of Rural Development heiwa da em ko leh ya ki Training Centre ha kiwa boon ki thaw ka jylla wei da ye ki leh wow pynyoh kreh ya kiwa boon kiwa da dep yei chah sikai kiwa da em kamwa 1000 ngut.
Chooh chooh da ong u wa kani ka Job Mela man ko leh kam chibynta i kaam yong ka chnat wow pynyachem ya kiwa thooh kreh wa kiwa e kreh wei da pynchlur u ya ki khynroo kyllood wow chim kabu ya ini i.
Neiliang u Brightstar kam u kongsan da ong u wa ka sorkar pyrdi da yoo ko wa ki khynroo yong i man ki ki wym em kreh wei ym chem thaw ki wow thooh kreh thooh khih, kamtæ da pynman ko kam kani ka Job Mela deiwa khut lang ya ki Company waphær waphær neibhah katni da chitom wow yoh kreh sorkar wei kam kini ki yarap sorkar da pynlait ko leh ya kiwa dang khynroo nei sih neibhah manda ym em kreh jooh yah ko chei sih.
Da ong u leh wa emkaam wow em i mynsien wow lai kreh cha baar jylla wym toh u kwah u neh bait hapoh ka jylla neibhah da chitom u yoh kreh yoh khih katni.
Ki Company wa da wan ha kani ka sngi toh ka Hyundai, Minda Industries, Pearl Global, Olive The Wellness Spa, NEON MOBICOM, We Care Health Care Service, De Mandarin wa kiwi kiwi de.
Na ki 300 tam kiwa da wan wow chimbynta ha kani ka Job Mela, da em 35 ngut kiwa da yoh kreh syndon, 70 ngut kiwa da em haka Shortlist wei kiwa boon kiwa da yoh kreh toh ha ki jait kaam Home Nurse, Hospitality wa ki karkhana chna kari.
