U Montri Rangbah ka jylla, u Conrad K Sangma kam chibynta ka Health Summit wa da pynman ha Shillong ha kani ka tayaaw, da saam u ya ki chithi thung kreh ya 164 ngut ki Staff Nurse, 78 ngut ki Auxiliary Nurse Midwives (ANMs) wa 181 ngut ki AYUSH Professionals hapoh ka National AYUSH Mission.
U Conrad hawa e yei klam heiyatoh wa i chait i khiah hapoh ka jylla, da ong u wa da booh bhah 8% ka bhah na ka mang tangka neibynta i kaam sumaar sukhær iwa heh dooh na waroh ki jylla wei nadooh wa wan ka sorkar MDA ha u snem 2018, da chem wym em thung kreh ya palat 500 ngut ki Doctor neidaw wa pynslem ware ka MPSC da palat 4 snem, kamtæ ka sorkar da sdang ko da ka Meghalaya Medical Services Recruitment Board (MMSRB), heiwa da ye wow thung kreh palat 500 ngut ki Doctor hapoh le bnai.
Da pyntip u leh wa ha kini ki kajiak snem wa da lai, ka sorkar da pynlut ko chiboon yow pynbha pynmiat ya ki PHC, CHC wa ki Civil Hospital kiwa nachwa toh kiwa da sih bha.
“Ka thong yong i toh wa kiwon kiwon kiwa emkaam yei sumaar ym emkaam de wow lai ki cha baar ka jylla. Ki kaam wa yatoh wa i chait i khiah u pynylla ki heitæ i rukom wa kiwa na baar ka jylla u wan ki cha Meghalaya yow yoh yei sumaar. Hao kani ka thong man ko kawa heh bha tangwa kawa da pynkhreh yow poi deiwa pynlut chiboon neibhah i chait i khiah toh i kitkhlieh ka sorkar kamjooh kiwi kiwa emkti ha ini i kaam,” da ong u Conrad.
Discussion about this post