Ka JNC Western Zone hei yahkhmat u Hamehi Bamon kam uPresident ka seiñ deilang wa ki dkhot yong ka, da lai yachem ki ya ki ar ngut ki Executive Engineer yong ka PHE wa u In-charge yong ka West Jaiñtia Hills District, kitæ toh u EE yong ka Electrical Division kamjooh ya u EE yong ka Civil Division wa u In-charge yong ka RWS, heiwa da e leh dei thoh hajrong i pynkreh khalær ya ka Scheme Jal Jeevan Mission.
Yeini da leh hadien wa da ood da naam kiwa boon kiwa chong chnong yong ka District wa hadien wa dadep pyndur u chna ya ki Top um wa ki Pipe um wow pynpoi um cha yung ki bru tangwa kut hi-eh heiwa i pynpoi um cha ki Top kamjooh cha ki yung ki sem ki bru ym em man ko kawa biang wei wym jooh yoh um ki bru.
Ka seiñ da ong ko wa ini i rukom pynkreh ya ka Scheme JJM man ko du kamwa 25% na ka 100% heiwa kiwa chong chnong ym yoh ki yei hok yong ki hanla ka chnat PHE da pyndur ko wa dadep u chna tangwa ym em krehkaam heiwa ki Top toh kiwa tyrkhaw kiwa baam sarah donhi, wei lada kamni pynyoo ko wa em i pynemkaam bakla ya ka poisa kawa man i hok i bhah ki paidbah wei da jia i leh neidaw wym em chimkhia ka chnat PHE.
Ka JNC da kyntu ko ya kini ki EE wow leh yeini i kaam wut-wut wow pynpoi um katkam wa toh u poi cha waroh ki chnong ki wym pu em u pynpoi um ha Top wa cha ki yung ki bru katkam ka Scheme ka hok ki chnong wa dadep u chna.
Neiliang kini ki sahep ka PHE da kular ki wow chimkhia wow leh yeini i kaam wut-wut wow pynmiat pynbha wei wow lai pait leh kylleiñ ki chnong khamtam ha ki chnong wym em u wan ka um wa ki wym em u biang um.
Ka seiñ da maham ko leh ya ka chnat PHE wow pynkrehkaam ki hapoh 2 bnai heiyatoh wa kini ki kaam wei ym chong kli kti lada ka seiñ chem ko wym em leh iyi iyi heiwa daw leh ko da kiwi ki luti wa rap eh.
Discussion about this post