Ha chi tyllup ka pyrthai ha man la ka 21 Naiynru da lehwarom ya ka sngi ka pynjra doh namo ka Yoga ya kawa da tip leh kam ka International Yoga Day, wei ynne ka sngi da lehwarom ya ka da ka Art of Living-Jaiñtia Hills Unit hajrong ka phang “Yoga at Home and Yoga with Family”.
Ya kani ka sngi wa kyrpang kawa da tip kam ka International Yoga Day da sdang nyngkong ha u snem 2015 wei da pteiñ u lehwarom ya ka man-u-snem hajrong ki phang waphær waphær.
Ha kani ka sngi neidaw wa em ka khlam COVID-19 da pyndam noh ya i leh Yoga cha madan næ ki yung paidbah wa ki skur wa ki thaw puræ waphær waphær wei da pynman ya ka da lyngba ka Video Conference na jar jiar ki yung ki sem kiwa chimbynta.
Ha uni u snem da e sikai pynjra da kiwa yahkhmat ka Art of Living Jaiñtia Hills Unit wa kynthup ya u Pearlet Toi, u Kamnipaia Challam, u Dapki Shylla chirup wa ki kattu kani ngut ki dkhot ka seiñ.
Ya kani ka sngi da lehwarom lyngba ka Internet heiwa ki bru wa chimbynta na Ri-loom Jaiñtia da em ki kamwa palat chispah ngut.
