Hadien wa ka seiñ da yoh yutip ko wa em i khloh moo pyrchah aiñ na ka wah Malidor da ki bru na Assam, kawa man ka thaw wa dang haap hapoh u pood u ang ka jylla Meghalaya, kamtæ ka KSU-Narpuh Circle hei yahkhmat u President, u Phanuel Tongper wa u General Secretary, u Yooni Muksor chirup ki dkhot ka seiñ da hiar lai pait ki haka 24 tarik uni u bnai heiwa da chem sakhiat ki wa em i khloh moo da ki bru na Assam.
Kini ki bru da em ki da ki spah ngut kiwa khloh moo deiwa pynemkaam da ka poohchiloom (JCB) kamjooh ki phaw tylli ki Truck wow kit ya kini ki moo cha Assam, iwa da pynsih pynjæd ya ka rymaw wa ya ka wah Malidor.
Kamtæ ka seiñ da pynsangeh wei beh syndon ko ya ki phaw tylli ki Truck wa kiwa kreh kiwa na Assam.
Hei takit ka seiñ na kiwa kreh da khana ki i pyrtuid uwa phah khloh moo toh u Lisu Terang uwa na Karbi, wei chong sah u ha chnong Malidor, Meghalaya.
Hei yaklam won ka seiñ wa uni u Karbi lyngba ka Phone, ong u wa da yoh bor u kamjooh leh ka Environment Clearance tangwa ym em won u kiwon kiwon ki kot ki sla na kawon kawon ka chnat sorkar.
Ka seiñ da phah ko ya oo wow sangeh ya kani ka kaam wei da maham leh lada dang pteiñ u, ka seiñ ym yohsa ko u leh deiwa khor.
Wei hei yaklam ka seiñ wa oo sñiawthooh ko wa emyatoh u wa ki bru ka chnat Forest kiwa toh u pait ya kani ka thaw.
Chooh chooh ka seiñ lyngngoh ko wa kattu la 3 bnai kani ka kaam pyrchah aiñ da lai ko katkam wa yoh khubor ka seiñ, tangwa kiwa kreh ka Forest wa em Beat Office ha chnong Ratacherra wa Ranger Office ha Umkiang, ym chynna ki ya kani ka kaam pyrchah aiñ wot kawa haap hapoh ki thaw yong ki leh.
Hajrong ini ka seiñ suba joor ko leh wa ye u emktilang ki bru kani ka chnat Forest wa uni u Karbi uwa pynlai ya kani ka kaam khloh moo pyrchah aiñ.
Heiwi won i liang ka seiñ ñiawliar ko yeini i khloh moo pyrchah aiñ, kawa da ktah bha ya ka rymaw, ya ka wah Malidor kawa em ki dohum khamtam leh ktah ko ya u pood u ang ka jylla neibhah ka wah Malidor man ko leh kam u Natural Boundary hapyrdi ka jylla Assam wa jylla Meghalaya. Wei lyngba ini i khloh moo pyrchah aiñ, ka wah Malidor kawa heh bha heipor lyuir daw chah kyntoor u pood cheiliang ka jylla Meghalaya.
Hawa pynkut neiliang ka seiñ da dawa ko ya ki bor wa toh u pait kam ka JHADC, ka State Forest & Environment Department wa kamjooh ka District Administration ka East Jaiñtia wow leh ko katkam ka aiñ ya kiwa emkti hajrong kani ka kaam.
Discussion about this post