Hadien iwa jia chah slaitbor wei chah tynyap ka Junior Doctor ha RG Kar Medical College ha Kolkata ha u snem 2024, da wanrah i yei sñiawkhia neidaw wa wiar næ wym em ki Video CCTV.
Hajrong ini da pynkhyrngiat chooh chooh i ya kiwa boon heiyatoh wa ki thaw sumaar sorkar ha nongbah New Delhi hadien wa yoh jubab na ka Right to Information (RTI), heiwa da chem wa ki spah tylli ki CCTV Camera ym em krehkaam ki.
Ha Lok Nayak Hospital ka nongbah Delhi da chem wa em palat spah tylli ki Camera kiwa ym em krehkaam kamjooh leh ha Lady Hardinge Medical College wei ini da pynkhyrngiat i ya kiwa boon ki paidbah.
Katkam ka jubab RTI na ki 706 tylli ki Camera ha Lok Nayak wa em ha ki Ward, ki rana, ki luti hapoh Hospital wa ki thaw psiah, 182 tylli ym em krehkaam ki.
Ha Lady Hardinge, 32 na ki 744 tylli ki Camera man ki kiwa Offline tangwa ki bor Hospital da ong ki wa da pait bniah ki yeini dei langær.
Ini i chem wan i hadien wa mih i sñiawkhia yei chngaaiñ kiwa lai thooh dawai, kiwa chah sumaar wei khamtam kiwa kreh hapoh ki thaw sumaar.
Hadien wa jia ha RG Kar Medical College, ka Union Health Ministry da hukum ko ya waroh ki Hospital ka ri wow pynkhlan yei paitsiar wei wow riñ Video da ki CCTV khnang wow ye u wanrah yei chngaaiñ.
Neiliang uwa paan RTI, u Dr. Aman Kaushik, da ong u wa ini i chem man iwa pynkhyrngiat ya kiwa boon.
Discussion about this post