Da ki spah tylli ki manyung wa em ha Dkhiah East Lad Sutnga da hap ki wow chong u sah hapoh i doom man-ka-miet la kamwa ar tayaaw tam kattu neidaw wa sih uwi u Transformer 250 kv uwa em hapoh kani ka chnong, wei ki paidbah hap ki u maad yei eh i khoo wa boonjait boon rukom neibhah wa ha kini ki sngi khlem ka bordiñ boon ki kaam ki jaam da thut lut ki.
Kamtæ ka Jaintia National Council-Khliehriat Circle hapoh i yahkhmat u Diamond Bareh, Working President JNC-KC hadien i ood i naam ki paidbah cha ka seiñ da lai booh dorkhat ki ha ka 9 tarik uni u bnai ha yung krehkaam u Executive Engineer MePDCL, Khliehriat Division yow pynsñiaw yei jynjar i saja ki paidbah neidaw wa dooh bordiñ wei da dawa leh na u EE wow pynyoh bordiñ noh smat smat yow myntoi ki paidbah.
Ha kani ka sngi neiliang u EE da khana u wa ka yung krehkaam yong oo da tip ki yeini, tangwa neidaw wym em Transformer hapoh ka Division dang hap thooh laad ki yow pynyoh, deiwa pynrap leh wa hei sakhiat ini man i i kaam wa khian wei ymtoh u saja ware hadooh kattæ kattæ, tangwa neidaw wym em Transformer tæ chimpor. Heijooh i por kular u leh wow yaleh hi u pynsmat katwa ye wa lah.
Heiyatoh wa ini, ka seiñ da phah ko leh ya ka dorkhat cha u Superintendent of Engineer ka MePDCL Jowai deiwa lai yachem wa oo ha yung krehkaam u wa em ha Jowai, wei neiliang yong oo leh ong u ym pu em tip u yeini tangwa mar ya tip daw leh u smat smat yei kaam yow pynyoh Transformer ya ka chnong Dkhiah East (Lad Sutnga), wei katwa ye kular u wow pynsmat.
Hawa kylli won ki heiyatoh ka bai bordiñ yong ka chnong Lad Sutnga khana u wa katkam i tip yong oo, man hi ko kawa lai bait lait sa du kattu katni tylli ki yung wa dang sah wei daw ah ya ka bordiñ ki wym pu su.
Ka seiñ booh ko leh i kyntu wei dawa joor wow pynsmat pynyoh Transformer khlem pynslem khang wa ki paidbah ka Dkhiah East Lad Sutnga lait ki u chong hapoh i doom.
Discussion about this post