Kam chibynta wow lehkmen Christmas yei wan manbru u Blai cha kani ka pyrthai hei dur u Jisu Khrist, ka seiñ Jaiñtia Students’ Movement (JSM) da e yarap sñiawbha Christmas ko cha ki ar tylli ka Balang wa kynthup ya ka Balang Presbyterian Pamrakmai wa ka Balang Presbyterian Khliehmyntriang.
Ha ka yalang wa tbian wa da pynlai da ki waheh yong katai ka Balang hei emlang ki heh yong ka JSM, da yoh yei klam na u President Rangbah ka seiñ u Leningstar Rymbai, u R. Dkhar, General Secretary Central Body wa na u Wellson R D Siangshai, President JSM Eastern Region kiwa da pynsñiaw yei sñiawkmen wa da ye u yarap sñiawbha da ki tiar tanghæng namo ki PA System, ka Guitar wa ka Drum Set.
Ka seiñ da ong ko wa hanla da chem chiboon i eh neibynta wow pynyoh yeiwa angnood yong ki Balang. Kiwa yahkhmat ka JSM da thooh laad wow yoh yarap yow pynchlur ya ki khon khynroo wow chlur ki ha i kaam tem kaam put, i rwai i siaw, kamtæ da kyntu leh ya ki wow sumaar wei wow pynemkaam hok ki ya kini ki tiar ki tar.
Ha kani ka yalang wa tbian da yoh leh yei klam na kiwa pynlai wa yahkhmat ka Balang wa da pynsñiaw ki yei sñiawkmen wa ka seiñ JSM da ye ko wow yarap kamjooh da kitbok kitrwiang chooh chooh ya ki kaam wa ka seiñ u nang ye ko wow chakri ha ka imlang sahlang ha kiwa boon ki liang khlem da ñiaw chiliang ya kiwon kiwon ki jait niam.
