Ka Meghalaya People United (MPUF-EJHD) ryngkat ka Sangchnong Circle hapoh i yahkhmat u President u Kyrshan Blah wa kiwi kiwa kitkaam ka seiñ, da lai e yarap ki da ki tin sap yung cha ki 6 tylli ki manyung mar le ban ha ka chnong Ladrymbai, East Jaiñtia Hills.
U Kyrshan Blah da dap u dei sñiawkmen wa da yoh u e yarap neibhah wa kini ki 6 tylli ki manyung toh kiwa duna hei yoh i la ha ka chnong neibhah kamwa man katni ya kini ki yung da sap du da ka tyrpal donhi.
Da e khublei u leh ya u Kyrmen Shylla uwa man u MLA ka 6 Khliehriat Constituency uwa man leh u montri ka jylla neibhah wa da smat u wow kreh wa ka seiñ wei ya kini ki tin da e da uni u montri.
U Kyrshan Blah da ong u leh wa ka seiñ daw pteiñ ko wow kreh wa u Kyrmen Shylla wow yarap ya kiwi ha ka thaaiñ ka jylla hi waroh kawi, khamtam cha kiwa duna ha ka imlang sahlang khnang wow lait ki nei yap thngan.
