Khliehriat: Ka seiñ Meghalaya People’s United Front-East Jaiñtia Hills District (MPUF-EJHD) ryngkat wa ka Sanchnong Unit, da lai e yarap ko kamwa 3 song ki tin sap yung ya ka manyng ka Heimonkaru Phawa wa u Hermon Rymbai na ka chnong Mokhaialong kawa haap hapoh East Jaiñtia Hills District.
Chwa wow ekti ya ki tin da em ka yalang wa tbian ya kawa da pynlai da u Adviser ka Sanchnong Unit, u Thanda Sana wei da yoh yei klam na u President ka Sanchnong Unit, u Juny Phawa uwa da kyntu ya katai ka manyung wow ngoohblai won neibynta ka seiñ khnang wa ka seiñ u ye chooh ko u e chakri cha kiwi tawon ki chnong.
Da yoh leh i klam na u President ka seiñ na East Jaiñtia u Michal Chyrmang uwa da kyntu ya kiwi leh wow e yarap cha kiwa emkaam sakhiat wei ymtoh wow man kiwa paitke donhi neibhah wa da pynkha ya ka Sanchnong Unit toh hadien wa tip wa em kawi ka manyung wa dooh ha chnong Mokhaialong kawa emkaam yarap bha.
Da yoh leh i klam na ka Heimonkaru Phawa kawa da e khublei ya ka seiñ deiwa ong wa sñiaw ko lakam wa phah u Blai ya ka seiñ wow e yarap ya ka yung yong ka deiwa kitbok kitrwiang leh wow pteiñ ko u kreh ya ki kaam wa bha hanlada em i eh i khoo ha ka luti wa kreh ko.
Ya kini ki tin wa u khoo da ekti da u President ka Sanchnong Unit, u Juny Phawa wei ya ki kyntien khublei da e da u General Secretary ka Central Body, u Aimonbha Syad.
Discussion about this post