Ka Khasi Students’ Union (KSU) Narpuh Circle ynne ka sngi da yoh ko wow yachem wa kiwa ha-yung u (L) Chiang Dhar uwa na Umkiang uwa da chah tynyap dusmon ha ki nong Bangladesh heiwa ynne da yoh leh wow pyndep yei leh niam wei lai tlep ya oo u lum tlep-bru ka Balang Katholik.
Ka seiñ da yoh ko leh wow yachem wa u Rahul Pohtam uwa man u paralok uwa lai lang ha katu ka sngi ka 6 tarik uni u bnai.
Hawa kylli na u Rahul Pohtam uwa da lait na tyrsim kini ki nong Bangladesh kiwa thrang snam, da khana u ya waroh iyi iyi wa jia ya oo wa ya u paralok kiwa da yachem syndet wa kini ki bru heipor wa lai ki cha bri kwai yow lai yang nei wan ki nong Bangladesh wow tooh kwai, tangwa syndet syndet da wan ki khrui wei khlem da poi pyrkhat da thombor ki ya kini ki ar ngut hadooh wym ye de ki wow yakhun kamtæ da pyrchang ki wow yut neini.
Tangwa u Chiang Dhar ym em yoh laad de u wow yut wei da chah ksoh wei da chah pam u ha kini ki nong Bangladesh kiwa da rah da ki wait wa jrong wa jrong bha wei da khlaad noh u pyn ha ini i thaw wa jia.
U Rahul Pohtam da khana u wa hadien wa da boon ware kini ki bru, ym nood de u wow yakhun wa ki wei ym yohsa de u wow yut na ini i thaw yow lai khana cha kiwi.
Ka seiñ da pynsñiaw ko yei sñiawsih wei chrai yeini i leh bru khloo wow chim siendon yei mynsien bru khlem i daw.
Da ong leh wa ka sorkar jylla lyngba ka chnat pulit toh u chimkhia ko wow pynman yei takit neibhah neiliang u Rahul Pohtam da lai ujor FIR u ha ki pulit Umkiang.
Ka seiñ da ong ko leh wa kiwa chong chnong yong kani ka thaaiñ khamtam kitu kiwa em thaw em bhaw kam ki bri kwai da chong sier wei khian mynsien ki wei ym nood de ki wow lai cha ki bri neidaw wa ki BSF wa em ha khappood ym leh ki iyi iyi wei ym ye ki leh wow khang yeini i yoh u psiah tooh ki nong Bangladesh, katwa ki BSF wa em ha National Highway da pynheh rupai ki deiwa pynthut wei jrong kti ya ki tre ri tre chnong kiwa lai wa wan.
Da pyntip leh wa katkam i khana ki tre chnong wa ki tre thaw hawa mut ki wow lai cha bri da chah pyndik ki ha ki BSF wa chong sonteri, katwa ya ki nong Bangladesh da yoh ki wow psiah wot hawa ye wow kær sainar.
Kamtæ ka seiñ da dawa ko na ka sorkar wa toh u phah ya kitu ki BSF wa em ha Sonapyrdi wa ha khappood chnong Dona, Umbluh wa Rattacherra wa toh u lai ki cha khappood yow leh yei kaam ki ymtoh ha National Highway.
Ka seiñ da yoh ko leh wow lai sñiawlem ya kiwa ha-yung u (L) Chiang Dhar uwa da iehnoh chadien ya ki ar ngut ki khon deilang waka kurim kawa da piah dohnood.
Discussion about this post