Kam chibynta ka dak i kynmoo warom ya ka lyngkhooh snem yap wa 163 u Kiang Nangbah ka wow man ha ka 30 tarik uni u December, ka Khynroo Khyllood Committee (KKC) Seiñraij Jowai ha ka 21 tarik uni u bnai da pynman ko ya ka yakob Dat Mooñiaw, ka Yatan Tylle wa ka Rah Mookhrah ha madan Dulong, Jowai, katwa ha ka 26 tarik won daw pynman ko ya ka yakob Siat Khnam ha Madan Madiah Kmaiblai.
Ha kini ki yakob da wan ya chimbynta da ki khynroo khyllood wa ki manbei na ki dong ki chnat waphær wei ki yakob da man kiwa yoosuk yoochongchit hapyrdi i wan sakhilang kiwa boon.
Ka thong yong i pynman ya kini ki yakob toh chibynta wow khriñ yei pyrkhat pyrdaiñ kani ka juk ka por chaphang ki yalehke kiwa u Kiang Nangbah ka-it sñiawsuk u wow pynwyrngia yei por khynnah yong oo chirup wa ki lok ki jor.
Kiwa jop ha ka yakob Dat Mooñiaw yong ki kynthai toh ka Panaliar-A deiwa pynrem ya ka Panaliar-B katwa heiliang won ki chynrang toh ka Loomiongkjam-A deiwa pynrem ya ka Loomiongkjam-B.
Ha ka yakob Taan Tylle won heiliang ki kynthai da jop da ka Loompyrdi Iongpiah deiwa pynrem ya ka Loomiongkjam katwa hapyrdi won ki chynrang da jop da ka Loompyrdi Iongpiah deiwa pynrem ya ka Loomiongkjam.
Ha ka yakob rah Mookhrah da em san ngut ki khon khynroo kiwa da yachimbynta wow ya pyntaw bor hei rah ya ki Mookhrah wa em hei khia kilo waphær tangwa ki ar ngut ki khynroo kiwa dapoi cha ka thong wow yaknieh yei naam yong kani ka yakob toh u Callten Sari wa u William Rymbai.
Neibynta wow ye u rai ya uwa jop, kiwa pynlai da wyrchaw ki yei por hei rah yow Mookhrah wa 107.48 kilo hei jngai wa 20 Metre heiwa u William Rymbai da ye u wow pyndep heipor wa 42 Second katwa u Callten Sari won da ye u wow pyndep heipor wa 39 Second, kamtae uwa rah Mookhrah wa khlan yong kani ka yakopb toh u Callten Sari.
Neiliang ka KKC, Seiñraij Jowai ha ka 26 tarik u December daw pynman won ko ya ka yakob Siat Thong ha Madan Madiah Kmaiblai neibhah kani leh man ko kawi na ki jait yalehke kawa u Kiang Nangbah ka-it sñiawsuk u wow pynwyrngia yei por khynnah yong oo.
Ka Seiñraij Jowai khutlang haroh ko ya waroh ki khon ka Bri u Niawtrep Niawskum wow wan sakhilang ya katai ka sngi kyrpang yong i leh warom ya ka sngi yap wa 163 u Kiang Nangbah, Khlawait ka Ri Jaiñtia ka wow man ha ka 30 tarik u December 2025 ha Madan Mynkoipyrdi Iongpiah nadooh i por 10:00 waje i step heiwa u Sanbor Shullai, Montri ka sorkar wa pait ya ka Art & Culture, Animal Husbandry & Veterinary Department Etc, u wan u wow man kam u kongsan.
Discussion about this post