Kamwa ha kylleiñ ki thaw man ka 2 tarik u Khonchonglad ki paaid wa ngait ka Balang Catholic jooh kynmoo warom ki ya ki mynsien kiwa da khlaad noh na sla pyrthai deiwa booh syntu, thang mombati wei pynman i duwai ha u lum tlep-bru khnang wa kitu wada khlaad u yoh ki yei maap yow poi cha beiñ. Kamtæ ynne ka sngi da sakhi wa neiliang ka Balang Catholic Jowai leh da pyndep ko ya kani ka bynta ha u lum tlep-bru wa em ha Moosalyngkat Jowai kam chibynta ka All Souls Day.
Ha kani ka sngi chwa u thang mombati da em chwa i ngooh i dem wei i sait pap ya waroh kiwa da khlaad noh, wada chimbynta da ki phadar wa kynthup ya u Fr. Hilarious Lamare, Parish Priest Jowai Parish, u Fr. Ferdinand Dkhar Diocesan Administrator Jowai Diocese wa u Fr. Simeon Sungoh.
Da emlang leh ha kani ka sngi ki Sister, ki bru waheh ka Balang Catholic, kiwa ha yung ha sem yong kitu ki mynsien wada khlaad noh wa kiwi kiwi.
U Fr. Ferdinand Dkhar hawa e yei klam yong oo da ong u wa kini ki mynsien wada kynmoo burom ha kani ka sngi toh kitæ kiwa da pyndep yei phet thong hei im yong ki, næ kiwa da kut noh i lai luti ha kani ka pyrthai chong wasa. Napyrdi kini em kiwa da phet thong du da ki kynta, em kiwa da ki sngi, ki tayaw ki bnai wei da ki snem, em won kiwa phet thong daki phaw phaw snem wot hadooh 70, 80 snem.
Chooh chooh ong u wa ha kam kani ka sngi pynkynmoo haroh ko ya waroh kiwa dang em ha sla ka pyrthai wa wot i leh daw ieh i ya kani ka pyrthai dei wow lai cha kawi tawon ka thaw.
