Ka National People’s Party (NPP) da yoh ko u knieh ya ar tylli ki MLA Constituency na ka Congress, itæ ha Mawryngkneng wa Rajabala ha kani ka Election chiteiñ samoi hadien wa da khlaad noh ki MLA ka Congress, tangwa neiliang u President ka NPP, u Dr. WR Kharlukhi da ong u wa i jop ha kani ka kynti ym em bynta ko ha ka Election MLA ka wow man ha u snem 2023 ha ka jylla.
Hawa yaklam hajrong iwa mih na ka Election ynne ka sngi, u Dr. WR Kharlukhi uwa man leh u MP ka Rajya Sabha da ong u wa ym ngait u wa ini i jop daw wanrah i leh ya i jop ya ka NPP ha u snem 2023, deiwa ong wa ha kani ka Election toh du ya ki 3 tylli ki Constituency katwa ha u snem 2023 toh neibynta 60 tylli ki Constituency.
Da ong u wa heipor wa lai yalap u ya ka Election ha kani ka kynti leh da klam bait u yeiwa ka sorkar da leh ko ha kini ki 3 snem tam wa dadep, katwa ka Congress da lai yalap ko du deiwa pynbaad wei kdaw-kti donhi, heiwa da pynrap u wa ki paidbah ha kani ka juk da man ki kiwa stat, wei lada ka Congress pynbaad ko wa da thied donhi ya ka Vote emkaam leh wow wanrah ko wa ki sabut.
U President ka NPP da ong u wa katni ymye wow pynbiej donhi deiwa suk ya ki paidbah, ki paidbah kwah ki wow tip iyi wa ka seiñ wa kiwa yahkhmat da leh ki, deiwa ong u leh wa ka Congress da synchaar ko ha ka jylla da palat 30 snem wei emkaam wow khana ko iyi wa da leh ko ha kitæ ki snem.
Hajrong i kam ki heh ka Congress wa kwah ki wow uiñ biang ki heh warim yong ka kam u Dr. DD Lapang, neiliang u Dr. Kharlukhi da ong u wa ymye wow khang yei kwah yong kiwon kiwon, deiwa pynrap wa ka NPP leh kwah ko ya ka Ampareen Lyngdoh, ya u Dr. Mukul Sangma wa ya u Vincent H Pala, wei lada wan ki, ka NPP daw man ko kawa kmen.