Jowai : Ka seiñ Meghalaya Liberation Association of Visually Impaired (MLAVI) ka seiñ neibynta kiwa duna ha ki khmat wa em ha Meghalaya da leh warom ki ya ka World White Cane Day ynne ka sngi ha Jowai yow pynbna paidbah yei kaam yong ki kam kiwa duna ha ki khmat wei da pynemkaam ya u dieñchdooh wa lieh kam i dak wow tipmit ka pyrthai ya ki neibhah uni u dieñchdooh toh uwa yarap ya ki hei im yong ki man ka sngi.
Ya ka yalang da pynman ha pchem ka Treasury Office, Jowai hei emlang u president ka seiñ u Benister Kharpor, General Secretary u Elkin Rynniaw wa kiwi kiwi ki dkhot ka seiñ.
U ma H.H. Mohrmen kam uwi na kiwa kyrchaan ya kani ka seiñ da yaroh u ya ki wa da ye ki u chna ya kani ka seiñ wei da pynkynmoo u ya ki wa ki ye ki u leh yeiwa kiwi ye ki u leh wei da e nongmuna u yei stat ki u thaaiñ tiar, u tem guitar kiwa oo ym ye u leh kamwa leh ki.
Da pyntip u leh wa u Kelvin Suting na ka chnong Moosakhia uwa da yoh yei kyrdan Master Craftsman na ka Jyoti Sroati School, Shillong daw yoh u sa ka District Award na ka sorkar jylla.
Ki dkhot ka seiñ kiwa klam da pynsñiaw ki yei boon i chitom wa chem ki khamtam hei lai kjat ha ki sarok wei emkaam ki ya kiwa yah kari u pyrkhat ki ya ki kamjooh leh ya ki pulit wow yarap ki ya ki.
Hei yatoh wa ini ynne ka sngi da pynman leh sa i lai kjat paidbah nadooh ka ophis u DC hadooh ha Yaw Thymme wa em ha Ladthadlaboh wei da saam leh ya ki kot cha ki paidbah kiwa batai chaphang i emkaam kiwa duna ha ki khmat.
Ya ka seiñ MLAVI da seiñ ha ka 11.11.2015 wei dang em ko du ka Central Body wei daw wai leh sa kiwi ki tnat yow yoh u tipmit lut ya waroh ki wa em i duna ha ki bor khmat hapoh Meghalaya.
Discussion about this post