Jowai: Kamwa leh ha waroh kawi ka Ri India wow kynmoo warom ya ka sngikha yong u wi na ki bru wa khroo ka ri India u Sardar Vallabhbhai Patel, uwa em hakhmat wow pynyoh ya i laitlooid ka ri na i synchaar ki pharæng kamjooh wow wanrah ya ka yatylli hapoh ka ri, ka Muklha Wahshnong Sport Club da leh warom ko ya kani ka sngi wa tip leh kam ka “National Unity Day” ynnin ka 31 tarik deilang wa ka NYK, Jowai wei da pynman ki leh ya ka “Run for Unity.”
Ha i step da em kamwa 35 ngut kiwa yachim bynta ha ka phet Marathon wa tip kam ka Run for Unity kawa jop da u Sa O ni Muruh na ka chnong Khliehtyrshi, wa ar da yoh u Ram Suna na Mukhla, wa le da yoh u Marbiang Nongbah na ka chnong Barato, wa soo u Callten Sari na ka chnong Mukhla, wa san u Arky Sari na Mukhla.
Da pynbood ya ini da ka yaleh football haprydi ka Mukhla Wahshnong Sport Club pyrchah ya ka Nein Shnong Sport Club Mukhla Nongrim. Ha chwa wow sdang ka yalehke football da em ka yalang sneiñ kyntu kawa pyllai da u Chairman ka dong Wahshnong u Markhuid Suna wei da yoh ya ki kyntien sneiñ na u Waheh Chnong Mukhla Nongrim u Mista Suna uwa da e mynsien ya ki khynroo khyllood wow bood ya ki kaam wa bha wa leh u Sardar Vallabhbhai Patel.
Da yoh leh ya i klam na u Secretary ka Dong Wahshnong u Muhon Sari, na u Player Suna uwa man kam u Secretary yong ka football Sport Club Mukhla Wahshnong, na ka P.D. Suting kawa man ka Volunteer yong ka NYK Jowai kawa pait ya ka Thadlaskein Block Area.
Da pynkynmoo ya ki khynroo khyllood wow man ki kiwa em i mynsien maap kylliang wei wow ya maya para marjan marpa.
Ha ka yalehke football hapyrdi ka Mukhla Wahshnong Sport Club wa ka Nien Shnong Sport Club, ka Nien Shnong Sport Club da jop ko da 3-1.
Discussion about this post