Chibynta i kynmoo warom yaka World Human Rights Day kawa jooh pynman khlieh u snem hajrong ka yurim u e ka wyrta pynsñiawtooh heiyatoh wa i hok longbru manbru hei rukom waphær waphær, neiliang ka West Jaiñtia Hills District Police, Jowai chirup waka District Legal Services Authority, West Jaiñtia Hills District, ynne ka sngi da pynman ki yei pynsñiawthooh ha ka yalang wa pynman ha District Library, Mynthong, Jowai wada wan chimbynta daki khynnah skur waphær waphær.
Ini i kynmoo warom man ko leh chibynta ka ‘Azadi Ka Amrit Mahotsav’ i lehkmen yei dap 75 snem i yoh laitlooid ka ri.
U Public Prosecutor, WJH u L.S. Ymbon hawa e yei klam hajrong ka phang “Fundamental Status, Economic, Social and Cultural Right in the Indian Constitution” da pynsñiaw haroh u ya ki kattu katni ki hok longbru manbru kamwa da kdaw haki Article waphær waphær yong ka riti synchaar ka ri.
U SI. G. Nongseij DCRB, WJHD hawa e yei klam hajrong ka Cyber Crime næ i chah thok haka juk stat wa katni lyngba ka Internet, da kyntu u ya ki khynroo khyllood wow em i bahkhlieh da ki yaki hi hei wow kiar u jubab ya kiwon kiwon ki bru wa Phone næ Message khnang yow lait nei chah thok wa boonjait, deiwa kdaw leh yei chah thok wa joor bha ha kini ki sngi kam lyngba ki Credit/Debit Card, i thap kreh Online, ka Identity Theft Fraud wa kiwi kiwi.
Da pynrap haroh u wa man iwa sakhiat, wa i pynemkaam Mobile Phone e myntoi bha ko ha kini ki sngi, kamtæ kyntu u wow pynemkaam hok deiwa tip leh u yada ya idæ.
Neitæ heiyatoh wa ka phang “Crime Against Women and Children” namo i chah thombor ki kynthai wa ki khynnah kynthai da klam pynche da ka SI. I .Kharpran, In-charge Women Police Jowai, katwa heiyatoh waka “Free Legal Aid and Free Legal Services” næ ki laad e yarap cha ki paidbah dei mynkna heiyatoh wa ki aiñ da batai daka R.M. Kharsyntiew, Chief Judicial Magistrate, kawa man leh ka Secretary yong ka District Legal Services Authority.
