Ka District Statistical Officer, West Jaiñtia Hills District, Jowai kawa man ka yung krehkaam wa kreh neibynta u lum, u pynlang yukheiñ yudiah yei ku i hiar i roi i paar haka District, ka jylla waka ri waroh kawi. Ynnin ka sngi da kynmoo warom ko yaka National Statistic Day ha Mynthong Community Hall wada emlang ki khynnah skur, kiwa sikai wa kiwi de.
Ya kani ka sngi wa da tipmit kam ka National Statistic Day toh yow pynsah naam ya u Prof. Prasanta Chandra Mahalanobis hajrong i embynta yong oo u pynwandur yei yoh i laa kamjooh u wanrah yei rukom chim yukheiñ yudiah wei kani ka sngi man ko leh ka sngikha yong oo.
Neitæ i kynmoo warom ya kani ka sngi man ko leh chibynta u pynsñiawthooh paidbah hajrong i emkaam ka Statistics næ i rukom chim yukheiñ hei im wa man-ka-sngi weiwa u sñiawthooh leh wa kammon i rukom wow yarap pynwandur.
U kongsan, u R. Sumer Deputy Director, Directorate of Economics & Statistics, Meghalaya Shillong hawa klam hajrong ka Statistics ong u wa ka Statistic embynta ko haki chnat krehkaam waphær waphær ka sorkar khamtam heiwa yatoh wei rep wei riang.
Hawa kyruiñ won u hajrong ka phang “Data for Sustainable Development” ong u kani ka sngi man haroh ko kam chibynta ka Azadi Ka Amrit Mahotsav namo ka mynsien lehkmen yep dap 75 snem i yoh laitlooid ka ri, wei hawa ong Amrit Mohatsav em i yajan wa ki jait wa thung, ki deiñ ki seij næ kiwon kiwon ki jait wa im, wa pynyoo wa klam ko leh chibynta heiyatoh ka phang wa ong Sustainable Development.
Kiwi won wa e i klam ha kani ka sngi kynthup ya u T.K. Sawian, Primary Investigator, u T. L. Shullai, District Statistical Officer, West Jaiñtia Hills, Jowai, u C. Buam, District Statistical Officer, East Jaiñtia Hills, Khliehriat wa kiwi kiwa da pynsñiaw i yaroh ya u Prof. Prasanta Chandra Mahalanobis hajrong ki kaam wada leh u haka imlang sahlang.
Yei kyntien e khublei ha kani ka sngi da yoh na u P. Syiemlieh, Inspector of Statistics, wei hadien ini won da saam leh yaki khusnaam ka yakob Elocution wada chim bynta daki khynnah skur.
